Das Nyekloster bekundet die Beilegung seines Streites mit der Gräfin Theda wegen des Schadens, der dem Bruder des Grafen Ulrich, Lyuward von Berum, zugefügt, und wofür das dem Kloster gehörige Ewenland in Anspruch genommen worden.
Wy broder Petrus prior, suster Enka priorissa, suster Remka ende suster Styne, senioren, myd den ghemenen conventesvolke des conventes tho Nyenkloster, bekennen unde betughen in desseme opene breve vor allen ersamen guden vromen luden geystlick ende wartlick, de ene zeen oft horen lesen, wo wy myt consent, willen ende vulbord des erwerdighen in God vadere ende heren, heren Thyen, abbeth to Wytwerum, ene stede vaste ewighe unvorbrokene vruntlike schedinghe ende slete hebben befruntschoppet ende anghenomen myd der edelen wolgheboren vrouwen Theden, tho Norden, Gretziil, Emeden, Berum, Auwerke etc. grevynnen in Ostvreslande, van twydrachten, unwyllen ende schelinghe twyschen orem zelighen heren greve Ulrike etc., ende ons alsuslanghe ghewezen van des schaden weghen zelghen Lyuwerdes, hovetlinges tho Berum, de tho Oldenborch ghevangen was, des ghenompten heren greve Ulrikes broder, [*] van welker schelinghe se up ons suslanghe ansprake ghehat ende zelghen Ewen land, tho Westerhusen hovetling, ghebruket hebben van der upgenomen hure ende allen anderen zaken ende schelinghe, de zyn gheleghen wo de gheleghen synt, twyschen ons wesende etc., so dat de ghenante vrouwe Thede uns vorscr. personen des conventes sodane erve weder overghegeven ende tho gude gheschulden hevet, des wy oer hoechliken danken, so dat wy broder Petrus, Enka, Remka unde Styne vorscr. van des conventes wegene vorben. vor ons, onse nakamelinghe, boren unde ungheboren, hebben myd guden vrygen willen de ghenompten vrouwen Theden, ore kyndere, erven ende vrunde, gheboren ende ungheboren, van des vorbenompten erves van der upghenomen hure ende van allen anderen saken ende schelinghen twischen ons ghewesen vrig, qwyd, ledich ende loess ghelaten ende gheschulden hebben, laten ende schelden vryg ende qwiid teghenwardich in krafft desses breves, so dat wy ofte onse conventes nakomelinghe, gheboren ende ungheboren, in nakomene tiiden myd geystliken ofte wartliken rechte darup nummemeer klagen, spreken, nyten edder haten wyllen ende schullen, ok ghene hulpe uth den vorscr. rechten hiirteghens to sokende sonder arghelist, hulperede ende nyevunde. In ene tuchnisse der waerheyt, dat desse vruntlike sehedinghe ende qwydscheldinghe by onseme Thilemanno abbetes vulbord ghescheen ys, so hebbe wy myd consent unser medebrodere unses cloesters ingheseghel, ende ik broder Petrus prior myn ingheseghel van des conventes wegen an dussen breff ghehanghen. Na Godes bord dusent veerhundert sen ende sechtich, des daghes sanctorum Symonis et Jude apostolorum.
x
| Edities |
E. Friedländer, Ostfriesisches Urkundenbuch I (Emden 1878), nr. 844 |
