| Nummer:oub0875 | Datum:5. April 1469 | Overlevering:Editie | Vindplaats:Ostfriesisches Urkundenbuch, I, S. 757, nr. 875 |
Die Häuptlinge von Knyphausen und Inhausen versprechen, den von Ritter Sibo von Esens zwischen ihnen und der Stadt Hamburg auf ein Jahr geschlossenen Frieden treu zu beobachten.
Vor alle den jennen, de desse scrift zeen edder horen lesen, bekennen wy Lubbe Onneken to Kripensen unde Alleke to Inhusen hovedlinge, alze wy etlike schelinghe und tosprake to den ersamen mannen borgermeisteren unde radmannen der stad Hamborg vormenen to hebbende, worumme denne de gestrenge ritter her(e) Sibo, to Esenze, Stestorpe unde Witmunde hovedling, alze eyn gud middler twisschen uns beiden erbenomeden parten umme forderinge des gemenen besten upgenamen und vorramet heft enen unverbrekeliken vrede, velicheit unde bestand een jar lang durende, so bekennen wy Lubbe Onneken unde Alleke erbenomed, dat wy mit wolbedachtem, beradenen mode sulliken unverbrekeliken vrede, velicheit unde bestand annamet unde belevet hebben, annamen unde beleven de jejenwardigen in kraft desses breves, so dat sodane vorscreven vrede, velicheid unde bestand uppe gifte dessen unses breves anstaen schal unde duren desset ganse jaar al uth, unde dat binnen desser sulven tiid de erbenomeden borgermeistere unde radmanne unde der stad Hamborg borgere, inwonere, koopmanne, denere, undersaten unde alle de jennen, de de erbenomeden borgermeistere unde radmanne to rechte vordegedingen willen unde scholen to watere unde to lande mit eren personen, haven unde guderen, na older lofliker wonheid mogen vorkeren, komende unde wech to reysende, wanne unde wo en dat geleved unde des to donde is vor uns, de unse unde vortmeer vor alle de jennen, de umme unsen willen doen unde laten willen, unde van rechte scholen sunder jenigerleie vorhinderinghe unde ane alle argelist unde geverde. To groterer tuchnisse unde vorsekeringe alle desser vorscreven stucke samptliken unde besunderen, so hebben wii Lubbe Onneken unde Alleke erbenomed unse ingesegele witliken laten hengen to dessem breve. Gegeven na Gades bord veerteynhundert amme neghen unde sestigesten jare, am mandage in deme Paschen.
