Gräfin Theda entlässt den Sohn des verstorbenen Sirk zur Friedeburg, Folkert, aus der Gefangenschaft und trifft Bestimmungen zu Gunsten der rechten Erben des Sirk und über Besitz- und Rechtsverhältnisse der eingenommenen Friedeburg und der dort gefangenen Mannschaften.
Wy Thede, grevynne in Oestvriesland, voir uns, unse kyndere, Hero Ommekens to Ezense, Stedestorpe unde Witmunde hovetlingh, bekennen openbair in dessen breve voir allessweme, dat wij zelighen [*] Syrkes sone tor Vredeborch myd synen knechten.unde hueslueden, unsen vanghenen, schelden qwijd erer vengknisse, lofften unde eden, soe se uns unde den unsen hebben ghedaen. Oek soe schollen unde willen de knechte unde huesluede, de in Ede Wymmeken unde Ede Boynges ghebede ere vanghene synd, erer venghnisse, loffte unde ede qwijd maeken sunder eren schaeden. Oek wedderumbe de vanghenen, de tor Vredeborch ghegrepen synd ueth Ede Wymmekens unde Ede Boynghes ghebede, schollen wedder to jegheners wesen to qwitende offte myd schattinghe jeghen zeligen Syrkes knechte unde huesluede, de in desser vorg. Eden to Jever unde Eden Boynghes vengknisse synd. Soe denne Folkert, Syrkes sone vorscr., [*] up synen vrygen voeten myd vrygen willen unde walberadenen moede deme erbern mester Tyaerde, kerckhern to Awrike, unde Haeren to Sybekeweerden, seligen Syrkes oheme unde broedere, den rechten erven tor Vredeborch, de borch hefft upghelaten, dairmede to doende unde to latene nae eren willen, de se voirt in unse hand unde ghewalt to der ghemenen Vresen besten hebben ghegeven, hebben wij Thede grevynne voir uns, unse kyndere unde erven myd eren willen dat erve in Broeckmerland, zo vele des seligen Syrke toquam, synen rechten erven unde kynderen to bruekende, to latene vryg reken unde unbeworen to eren besten wair se willen; desghelijken scholen zeligen Syrkes rechte erven unde kyndere, zeligen Syrkes hues to Ezense besitten unde brueken unde laten, waer se dat willen; voertmeer soe schollen unde moeghen zeligen Syrkes erven unde kyndere alle erveguedere, de Syrck naeghelaten hefft, ze syn gheleghen in wat lande unde ghebede, dat yd sy, besitten unde bruekende wesen, daer wij en myd all unsem vlyte unde vormoeghe willen behulpelick inne syen, offt en des noyt unde behoeff woerde, wair wij konnen unde moeghen myd rechte. Voirtmeer wanneer wij uns myd Eden Wymmeken umme de Vredeborch vorlykenen unde voerenyghen, willen wij Syrkes knechte myd breven unde zeghelen van en dairan soe besorgen, (dat) he se umme deswillen haeten noch veyden en schall to jenighen tijden; oek allen knechten und huesluden nu tor Vredeborch wesende hebben wij vorlaten unde vorlaten jegenwordighen in krafft desses breves alles unmoedes unde anspraeke in desser veyde vorresen, is sy van woerden effte werken; welck oek van densulven knechten offte hueslueden in Reepsolter edder Merxer kerspellen edder anders in unsen ghebeeden, zoe se eer ghedaen hebben willen wonen, willen wij ghunnen unde tolaten, unde ze by erer rechticheit unde den eren, zo se by zeligen Syrkes tijden deden, zitten laten. Welck oek van knechten unde hueslueden, de nu tor Vredeborch synd, in unsem denste willen blyven dairsulvest, willen wij nemande vorwisen, unde willen malken soevele gheven, als em jeghen Paeschen toghesecht is; wee oek dair soe langhe nicht blyven en wyll, willen wij malkem geven synen antaell, soevele als em boeren mach; de denne sunder unsen ovelenmoet van uns ghaen mach wair he wyl, dair wij en nicht aen en willen hinderen. Oek soe schollen alle vanghene, de tor Vredeborch in vengknisse unde ghefanghen synd uth vrowe Theden unde Hero Ommeken ghebeden erer venghnisse, loffte unde eden, als se seligen Syrke unde synen knechten ghedaen hebben, wesen vryg unde qwijt gheschulden. Oek soe willen wij Thede grevynne unde Hero Ommekens seligen Syrkes knechten unde hueslueden, den he ghelt ghelovet hefft, eren bewysliken schaeden unde ere loen degher unde all guetliken gheven unde vornoeghen. Oek soe willen wij Thede grevynne unde Hero Ommeken behulplick wesen voeghen, soe dat syn erve em schal vryg unde qwijd wesen, dat he in Wangherland unde in Eden to Jevere gbebede ligghende hefft; isset sake, dat Ede em dat erve umme des willen entweldighen wolde, dat he tor Vredeborch ghedenet hefft unde noch ter tijd dair ys; oek soe wyllen wij Thede grevynne ghunnende wesen, soe dat desset vorborghede ghelt, dat Boye to Hesell vorborghet hefft, schall weerden uethghegeven unde vornoeghet. Oek schollen de knechte tor Vredeborch hebben van den dren vanghenen van Uthorpe vifftich Postulatsguldene. Hiir hebben an unde over ghewesen voir deghedingesluede unde tueghe de erbern vromen unde duchtighen manne Hicko Maurizes, licenciaet in legibus, Here Maurizes van Dornum, ghebroeder, Haye tor Papenborch provest to Leer, Gherd to Petkum, Snelgher to Uphusen, Beno proest to Utthum, Ubbo to Uppleghewert, Hycke Boynghes hovetlingh unde Gayke Ukens to Berum, Hayke to Marienhove amptluede, Merkel Enghen to Blantorpe unde ander gueder luede ghenoech. Dessen tor orkunde unde merer vestnisse hebben wy Thede greffynne voir uns unde unse kyndere unse secreetzegel, ick Hero Maurizes vorscr. myn inghezegel voir Hero Ommeken umme syner bede willen, wante he noch ghenes ingeseghels en brueket, unde wij Haye tor Papenborch, Beno proest to Utthum unde Hicko Boynghes vorscr. unse inghezegele mede doen unde ghehanghen an dessen breff. Nae Christi geboert vierteynhundert in deme vier unde tseventighesten jaere, ame dinxdaghe voir sunte Thomas dage, des hilghen apostels. [*]
x
| Edities |
E. Friedländer, Ostfriesisches Urkundenbuch II (Emden 1881), nr. 942 |
