| Nummer:oub0979 | Datum:Emden, 26. Sept. 1476 | Overlevering:Editie | Vindplaats:Ostfriesisches Urkundenbuch, II, S. 78, nr. 979 |
Schiedsspruch zwischen den Kindern und den Enkeln Wiard's von Oldersum über allerlei Grundstücke, Einkünfte und Kompensationen.
Kundich und apenbaer syd allen, de desse nottulen sehen offte horen lesen, datt wi deghedinges- und gekoerne vullmachtige schedesheren nagesehreven hebben eindrachtigen eine vaste stede vruntschup und schedinge gemaket tusschen de erbaren und beschedenen Hayken, tho Oldersum hovettling, bi der enen, und vrouwen Dyudleve, Ailt und Hicken ere sones, hovetlinge tho Oldersum, van der ander syden, umme schelinge, gebreke und twidrachte, de se under anderen hadden, heerkamende van erven, guederen, renten, wundingen und anderen, so ein deel hyrna geroeret werdt in desser nottulen. Int erste hebben wi schedesheren uthgespraken, als Dyudeloff klagede, datt se mistede 11 grase, und so klagede Hayke, datt he mistede derteindehalff grase, datt dan de 11 grase schollen staen jegen de 11, so beholt Haike 1 1/2 gras mit Diudleve und eren sons. Item datt erve in dem Simonswolde und thor Gast scholen se gelycke intwe delen, alse broder schuldich sint tho delen, und de rente darvan scholen se ock delen gelycke. Item de venne, de de schriver gebruicket hefft, de sall Diudeloff und ere soens halff und Haicke de anderen helffte bruiken, nadem salige Wyardt de in vullen besitte hadde, und darmede bestarff, und hefft Hayke des vorgescr. landes jenigen schaden gehatt, schall Diudeloff und ere sone [*] eme weddergeven. Item als Diudeloff klagede umme 16 Rinsgulden, de Hayke van Osede tho Eppingeweer schulde geboerett hebben, datt schall staen an [*] Osede effte an syn huisfrouwen; seggen de, datt Haycke de geborett hebbe, so sall Hayke Diudelove de wedderumme geven. So dan klage was van Diudelove, datt in dem tichelwerke vele vordurven were und ock umme 8 dusent stenes, de eer Hayke schuldich wer, soe [*] sall Hayke Diudelove betalen die 8 duysent steens, und daermede voert mit dem anderen thovreden wesen. Item alle die bruggen, die thor borch denen, horen und synnen, de sollen se gelick holden und timmeren, und thosamen gebrueken tho beyden syden und allen enden, und numment dem anderen behindern. Item so sall ock de wesselinge der erve tho Borsum und Widdelsweer bestaende bliven in voller macht, so die thovoren ghemaket is. Item van de wundinge, die Hayken knechte Aylde deden, daer sall Hayke 20 Postulatesgulden voir betalen tuschen hyr und mydwinter erstkomen, und die leggen in mester Hycken hande, die se dan sall und will boeren nae Ayelts begeren und heten. Hyrmede sall alle unwille, twydrecht und schelinge und thosaghe tuschen beiden parten vrundtliken enwech gelecht und tho enen alingen ende gescheden und gesleten wesen sunder jenigherleye arghelist, und sollen sick holden als broder und susters, und de vrundtschap mydt malkanderen nicht tho voerbreken mydt handen und munden by pena van viffhundert Rinsgulden, die helffte an unser gnedigen frowen [*] hande, und de ander helffte an uns schedesheren hande. Und wert, datt jemant desse pene voerbreke, dat vorhoet moete bliven, wyll unse gnedighe frowe und wy schedesheren mydt truwen de ene den anderen helpen manen de pena van den, de se vorbroken hedde. Schedesheren synnen gewesen de erbarn mester Hycke van Dornum, proest to Embden, licentiait im keyserrechte, Haye thor Papenborch, Hero Maurizes und Gherdt to Petkum, hovetlinge, van der enen syden, juncker Poppo tho Pewessum, Egher Tannens, Ubbo to Uplegewert und Vrowe Occo tho Uphusen van der anderen syden. Desser nottulen sinnen twe, die eine uth der anderen gesneden, der ein ider part eine tho sick genamen hebben. Gescheen und ghededinget tho Embden, des donnertages voir Cosme et Damiani, anno Domini MoCCCCo septuagesimo sexto.
