| Nummer:oub1018 | Datum:5. Juni 1479 | Overlevering:Editie | Vindplaats:Ostfriesisches Urkundenbuch, II, S. 106, nr. 1018 |
Die Vorsteherinnen des St. Jakobsklosters zu Langen bitten den Abt Sebastian vom Oldenkloster zu Merna, den von ihnen und den Vorstehern zum Propst von Langen gewählten Prior zu Wittewierum, Johann von Boemel, zu bestätigen.
Venerabili in Christo patri ac domino, domino Sebastiano gracia divina in Merna in antiquo claustro abbati, pro ceteris obediendo, debitam, humilem et promtam obedienciam. Vestre si quidem venerabili paternitati duximus referendum, [*] quod nos sorores et moniales Enne priorissa, Beleke subpriorissa, Hebe et G(hebbeke)[*] cantatrices ceterique conventuales sexus utriusque monasterii sancti Jacobi in Langhen, parcium Frisie, Monasteriensis dyocesis, Premonstratensis ordinis, publice protestamur per presentes, quod post vestre prepositure, regiminis ac pastoris cure liberam resignacionem in Langhen, predicte formidantes ecclesie nostre viduate propter pastoris absenciam dampna non modica imminere, cupientes periculo ac dampnis ecclesie nostre prefate imminentibus obviare, pretermissis omnibus ceteris electionum viis, per viam compromissi rebus ut nunc se habentibus decrevimus procedendum, nichilominus prout dignum erat prius sancti Spiritus gracia invocata. Quapropter universi et singuli matura deliberacione prehabita, consensu eciam unanimi, nec uno quidem dissenciente, compromisimus et iam actu compromittimus per presentes in dilectos confratres nostros, dominum videlicet Jacobum, nostrum priorem et fratrem N, qui ut ipsi tamquam veri electores vice et loco tocius conventus nostri postulent[*] ac postulando eligant una cum consilio et consensu vestre venerabilis paternitatis honorabilem ac religiosum virum et dominum, dominum Johannem Boemel, priorem novi claustri in Florido Orto, professum Premonstratensis ordinis, in prepositum et prelatum monasterii nostri predicti in Langhen predicto promittentes eciam, quod postulacionem ac electionem sic ut prefertur iuridice factam universi et singuli ratam atque firmam acceptemus, subiecturi colla nostra eiusdem sic electi imperio secundum venerabilium patrum nostrorum precedencium sanxiones, dolis, fraudibus ac novis quibuscunque adinvencionibus seclusis. Quapropter ne nostra ecclesia pastoris solacio privata videretur, nos electores prefati elegimus ac per presentes eligimus honorabilem dominum Johannem ut prefertur in nostre ecclesie prepositum et pastorem in Langhen predicto, quam electionem tenemus ratam et validam et tenore presencium approbamus. Quare igitur reverende paternitati, in qua eonfidimus, predictum Johannem sic a nobis electum, ut prefertur, presentamus, et transmittimus vestre reverencie humiliter supplicando eiusdemque graciam postulando, quatinus sepedictum priorem in nostrum pastorem et prepositum nostri monasterii in Langhen auctoritate vestra dignemini confirmare, curam et administracionem nostri monasterii in spiritualibus et temporalibus eidem plenarie committendo, ut divina assistente gracia nos per sue circumspectionis industriam in spiritualibus et temporalibus dirigamur et salubria Deo dante suscipiamus incrementa et Domino propicio de tam provido et fructuoso gaudeamus amministratore;[*] ergo venerabilis paternitas in hiis oculis misericordie nos respicere velit et dignetur. Acta sunt ista anno salutis nostre millesimo quadringentesimo septuagesimo nono, quinta die mensis Junii.
