| Nummer:oub1240 | Datum:24. Jan. 1489 | Overlevering:Editie | Vindplaats:Ostfriesisches Urkundenbuch, II, S. 292, nr. 1240 |
Bäcker Focko und dessen Frau Lubbeke zu Emden verkaufen der Grete Philippus zu Groningen eine jährliche Rente von 13 Arensgulden für 210 auf ihr Haus zu Emden aufgenommene Gulden.
Ich Focko, backer, ende Lubbeke, myn echte huesfrowe, borgher bynnen Emeden, enkennen unde betughen openbair vormyds dessen openen beseghelden breve voir uns ende unsen rechten erffgenamen ende voir alsvveme, dat wy eendrachtliken hebben vorkoft unde vorkopen teghenwoirdich Greten Philippus, borghersschen bynnen Groningen, unde oeren kynderen ende rechten erffgenamen dorteyn Arnesgulden renthen Emeder payments, jaerlix to maenen ut unsen huse ende alyngen guderen, staende bynnen Emeden tusschen huseren Haere Wynekens, amptmans dairsulffs, unde Frederick Fycken, up mydvasten to betalen, myt alsoedaner gnade unde vorworden, dat de erghen. Focke ende Lubbeke, oft oir recht erffgenamen, desse voirscr, renthe alle jaer unvoryaert up mydvasten, alse de renthe tovoeren wal betailt is, myt twehondert ende 10 Arensgulden payment voirscr. weder vry ende quyt moghen kopen sonder jenigherleye arghelist. Tugheslude hyrto gheeysschet unde gheropen synt ghewest de beschedenen Wessel, scroder, unde Bernhardus, scriver, borghers dairsulffs to Emeden. To groter betuchtenisse der wairheit hebben wy Focke ende Lubbeke wylliger vruntliken ghebeden deme ersamen Haere, amptman bynnen Emeden, umme dannen breeff voir uns to beseghelen, deme ick Haere, amptman upghenoernt, dorch bede unde wytliker waerheit willen alsoe ghedaen hebbe. Ghegeven in den jaer unses Heren dusent veerhondert, dairna in den jaer van LXXXIXo, up avent conversionis sancti Pauli.
