| Nummer:oub1244 | Datum:31. Mai 1489 | Overlevering:Editie | Vindplaats:Ostfriesisches Urkundenbuch, II, S. 294, nr. 1244 |
Ritter Hero von Dornum und Häuptling lko von Knyphausen bekunden, dass sie den Prior Bernd von Esens nach Groningen geschickt haben, um zwischen ihnen und dem Rathe daselbst für einen auf ein Jahr abzuschliessenden Waffenstillstand eine Tagfahrt zu vereinbaren.
Wy Hero van Dornum, ritter etc., to Jever, unde Ike[*] to Knipensen, hovetlinge, bekennen unde betughen openbar in unde myt dysser certer, wodanewyss alse wy myt den ersamen unde vorsichtigen borgermesteren unde rade der stad Groningen unde den landen myt en vorbunden een vrunthlick velich bestanth en jar lanck durende anghenamen hebben, so de breff, en van unss darup ghegheven, myt mer worden inholdende ys; hebben wy darup den erwerdighen religiosen her Bernde, prior to Essens, binnen Groningen myt volmechtigher credencien ghesent, dach, dachstede unde schedesheren naamaftich to makende, unde wedderumme van den ersamen rade vorb. to entfanghende unde avereen to komende; deme he so ghedan unde wedder entfangen hefft, nompliken den dach up den dinxtdach vor Pinxten erstkomende[*] ter Munte int closter to holdende unse schedesheren, den ersamen vorsichtigen her Taden, kerckheren to Werdum, unde den erbaren Hicken Boyngs, hovetlingk derselves, up den vorb. dach unde stede; de ersamen rade der stad Groningen ock op den vorb. dach unde stede twe schedesheren, de werdigen wolwysen unde erbaren ghestrengen her Harmen Ellerwolt, licentiaeten in den hilligen schifft, kerckheren tor A bynnen Groninghen, unde her Johanne Rengher, ritter, to schickende unde to besendende, de ver van beyden parten schedesheren vorb. de sake dar tor stede overtolegghende unde besprekende, deselften sek denne offen onder tyd daghe offte stede wedder to settende, bynnen dyssen jare alle schelinghe myt vronscop wedder to legghende, by ener pene, so de schedesheren settende werden. Wereth ock dysse uthsprake aldus schege, unde de .jement van dyssen parten nicht wolde holden, de schal de penen in des overmans unde schedesheren hanth bynnen teyn dagen betalen, eder de uthsprake schal gheholden waerden. Vorder offte de schedesheren vorb. der schelinghe nicht overenss konden comen, so scholen se vollnacht hebben eynen overman to kesende, de schelinghe vruntliken to enem ghuden uthdraghe to bringhende, by penen vorgheroreth se settende werden. Weret ock sake, jement van dyssen ver schedesheren offte overmanne de daghe nicht konde holden, so schall me enen liken persone in syne stede vulmachtich setten; weret ock wy sulven to dem daghe nicht konden komen, so moghen unde wylle wy alle tyd unse vulmechtigen schicken. Des wy upghenannthen Hero van Dornum, ritter, etc. to Jever, unde Ike to Knipensen, hovetling etc., unse rechte ingheseghele wytliken hebben lathen drucken under dyssen breff. Na der borth Christi Mo CCCCo, darna in den neghen unde tachtigheste jare, up den sondach na ascensionis Domini.
