Heirathsvertrag für Ritter Hero von Dornum und Irmengard von Oldenburg, abgeschlossen von Hero und den drei Grafen Adolf, Johann und Christian von Oldenburg.

Umme raesten unde vreden, eyndracht unde fruntschap willen unde deynst der lande unde der lude der herschap Oldenborg unde eyn pard Oestvriessland, benomptlicken uns Hero van Dornum, tho Esensse, Wytmonde, Steedesstorpe, andrepende, is overmyts den edelen unde wolgheboren juncheren Aleff, Johan unde Kersten, ghebroderen, tho Oldenborg unde Delmenhorst greven, an eyne, unde uns Hero ritthere unde heren vorg. an de anderen syden, ame daghe Marci confessoris, eyn fruntlick unvorplichtet dach to deme Borchfoerde[*] vorbespraken unde vorschrevene, betaghen unde gheholden unde vullencamene leyffliken unde eyndrachtichliken in desser nabeschrevenen wysse besloetene, so dat de upghenanten juncheren Alff, Johan unde Kersten, ghebrodere unde greven vorg., umme sunderghere thovlucht unde fruntschup, se tho uns Hero, ritthere unde here vorg, haddene unde ytzundes hebbene, de edelen unde wolgheboren ere sunderlingx leve susstere, frouwchene Ermgarde tho Oldenborch unde[*] Delmenhorst dochtere, uns thogesacht, ghelavet unde to der ee na schickynghe des almechtighen Gades gantzliken thogheslaghen hebben, myt ghewontliken unde unstraffeliken clenoden unde klederen, unde daertho dredusent Rynsche guldene, so datz de upghenante grevene unde broderen twusschen datum desses recesses unde lichtmyssen[*] erstkomene schoelen unde willen uns Hero, rittere vakenben., enkede tyt unde stede vorwytliken offte vastliken thoschryvene, daer wy de ersten twedusent Rynsche guldene toer noeghe leiffliken untfanghen schoelen, unde daerna ame manthe offte twe meere offte myner de vorbenomde frouwchen an unsene landene unde ghebeden tho brynghene, welkent denne by dene vorg. grevene unde broderen staen unde macht wesen schal, dat me denn up dersulfften stede unde tyt, daer men de twedusent Rynsche guldene overantwordt, oversprekene unde vurdere beteken schalt, wanneere sulke vortruwynghe unde inbrynghent schal zyn; ock denne fordere tho dersulven tyd unde stede over tho tracteren unde vorhandelen umme de eynedusent Rynsche guldene, de naestendich denne blyvene, des de grevene unde broderen ereghenompt eyn jaer daerna der betalynghe der twyer dusent Rynscher guldene vorgheroert scholen dult unde vryst hebbene unde vorwyssynghe offte ghelovene overmits gheloffliken borgheren, daer wy Hero, rittere vorg., ghenoeghe an hebbe, tho donde. Hyrupp schalt unde wil wy Hero, rittere vorghenompt, der vylghen. frouchene Ermgarde dochtere voirg. alle yaere hundert Rynsche guldene tho ereme unde erene juncfrouwene behoeff offte clenode tho hulpe ghevene, welkent tho erer morghenghave beredet unde ghededynghet is. Furdere is overmyts dene beydene parthene vorg. beredet unde vasteliken bespraken, offt sick na schyckynghe edder wyllene des almechtighen Gades vorlepe, dat wy Hero, rittere unde here tho Eszenszen etc. vorghen., overmits dode voer ere vorvelle, dat God affkere, unde wy denne thosampt neyne erven en hadden, denne schal de vorben. vrouchen Ermgardtz dochtere vorgh. uth demesulfften lande eerbenomt unde ghuderen veerdusent gholden Rynsche guldene wedder hebbene, entfanghen unde tho ereme wyllen sunder yenich indracht rastliken unde vredesam van daer brynghene, ende dewyle se sodanne vorg. veeredusent Rynsche ghuldene nicht untfanghen hefft, mach ende schal se syck holdende unde hebben an de upgen. sloete unde borghe, lande unde luden, sundere jemendes weddermoet, beth so langhe se der vorg. veerdusent Rynsche guldene guede betalynghe hefft, unde des scholen unde wyllen wy Hero, rittere tho Eszensze etc., ere eynen openen noethafftighen beseghelden brieeff de upgen. greven unde broderen vorg. tho behoeff erene lievene susstere bavenbenornpt na ghuder vorwarynghe unde in der besten formen unde wysze, als men den maken mach, daeruppe ghevene. Ock so wyllene unde schoelen de vorg. beyde parthene de eyne deme anderen bystand, hulpe ende trost myt lande unde luden doen, unde in synen noedene nicht tho vorlatene, daer de eyne des anderen tho rechte mechtich is, na furderem inholde der vorbundebreve. Alle desse vorghescrevene stucke, articlen unde punthen syn van den beyden parthen vulborth believet, besloten unde bewillekorth by pene veerdusent Rynsche goldene ghuldene; sodanne wysz wol dess ere vorg. vorhandelynge, dedynghe offte bewyllent thorugghe treth edder affgheyt, de schal unde wyl deme anderen parthe bynnen deme sulvene yare veerdusent gholdene Rynsche ghuldene by syner eere unde ede staeth sunder yenighe weddersprake offte inholdent noch myt gheistliken edder werlikem rechte tho bedeckene unde ane arghelist, nye vunde edder hulperede, degher unde all ghevene unde vornoeghene.
Dessze voergheschrevene voerzeghelynghe unde overantwordene der brieve schal scheen uppe desulfften tijt unde stede, als men de vorg. twedusent Rynsche guldene vornoghen unde uthghevene schal sunder alle arch noch inholdent. Desszes tho merere tuchnissen unde bewysynghe syn desser recesse twe ghemaket, allike ens ludende van woerdene tho woerdene, unde de eyne parth vorgheroert deme anderen parthe syn recess vorszeghelet, unde wy Hero rittere vorghenomt hebben tho oerkonde unde furdere bekantenisse unse rechte ingheseghel wytliken benedden an desset recess doen hanghen. Dat ghegheven is ame jare dusent veerhundert in deme neghen unde achtighesten, ame donnerstendaghe na Marci confessoris.

x

x

Fonds	Ostfriesisches Urkundenbuch, II
Fol.nr.	S. 301
Nr	1254
Olim	Orig. Perg. im Grossherzoglichen Archive zu Oldenburg.
Jaar	1489
Datumcode	JpMarci

x

x

Commentaar	Siegel: Quadrirter Wappenschild, 1. und 4. die Wittmunder Peitschen ins Andreaskreuz gestellt. 2. und 3. der Bär von Esens. Helmschmuck: Die Lilie und zu beiden Seiten je eine Peitsche.

x

Materiaal	papier

x

Edities	E. Friedländer, Ostfriesisches Urkundenbuch II (Emden 1881), nr. 1254