| Nummer:oub1262 | Datum:5. Febr. 1490 | Overlevering:Editie | Vindplaats:Ostfriesisches Urkundenbuch, II, S. 307, nr. 1262 |
Wybbe Freydsna zu Bettewer verkauft dem Kloster Langen 8 genau bestimmte Grase Landes.
Kundich unde openbaer syd allen, die dessen bryeff syen offte horen leesen, dat ic Wybbe Freydsna to Betteweer bekenne, dat ick myt mynen vryen will ende voerberadens synnes, myt will ende raet mynder vryenden, heb vercofft ende vercope tegenwordich in krafft desses bryeffs to enen steden, vasten, ewygen erffcope to ewygen tijden, den eerwerdigen ghestelicken prelate, heer Johan van Boemel, proest to Langen, ende suster Enne priorisse, Tyake subpriorisse ende gemeyne conventesluden off haren nacomelyngen, acht grase landes, ende is gelegen in uns grote sloech in Loeghenre hamryck an dryen stucken. Dat yerste stuck syn drye graes, liggende upt west van des cloesters hoywech. Dat anderde stuck syn vyer graes, liggende an des cloesters hoywech upt oest. Dat derde stuck in een gras ende lecht an dat eynd van uns grote sloech vast aen den heerwech, die dar gaet van Lerlt heen to Loquart. Desse vorscr. achte gras landes heb ic vercofft den vorscr. proest offte convent to Langen ende dat voer eenre summen gheldes, als vyerentachtentich golde Overlentsche Reynsche gulden, die my die vorscr. eerwerdige proest degher, vol ende all waell hevet betaelt den yersten pennynck mytten lesten to mynen wille ende ghenoeghe, dat ick hem dancke; ende myt vorwarden so will ick Wibbe vorscr. offte myne erven den proest ofte sine convent des copes een recht waerre wesen voer alle ansprake, voer alle gherichte ende ungherichte nu ende to ewygen tijden, so vaecke ick dartoe geeysset werde, up mynen koste, alle argelist, bedroch ende nye valsche behelp desses copes schedelick utgesproken. Hier hebben mede, an ende over gewesen Aden Freydsen, Aylt, kroegher to Betteweer ende Dyrck Sprengher, vor tughe dartoe geeysset ende gebeden. Ende om meerder vestenisse der waerheyt, so heb ick Wybbe vorscr. gebeden den eerbaren kerckheren heer Foelrick to Loegen ende den eersamen Haro Wynekens, amptman to Emden, dessen bryeff myt haer ingezegelen to bezegelen van mynder weegen; ende wy heer Foelrick ende Haro Wynekens, amptman eergenomed, dat so geerne hebben gedaen om Wybbe vorscr. vryntlicke bede[*]. Int jaer uns Heren dusent vyerhundert ende tnegentich, up sunte Agathe joncfrouwen dach.
