| Nummer:oub1324 | Datum:19. Juli 1492 | Overlevering:Editie | Vindplaats:Ostfriesisches Urkundenbuch, II, S. 356, nr. 1324 |
Die Stadt Bremen intercedirt beim Grafen Edzard von Ostfriesland für ihren ehemaligen Rathsherrn Johann, der von dem Emder Bürger Joh. v. Haren für 4 Last Bremer Bier 48 Bremer Mark zu fordern hat, und theilt mit, dass der Rathsherr den Häuptling Folkuf Alkenson zu Inhausen bevollmächtigt habe, seine Sache zu vertreten.
Juw, eddelle wolgebornne junchere Edzardt, grave in Oestvresslandt, unssem levenn junchernne, biddenn wy borgermestere unnd radtmanne der stadt Bremenn mit dessem unssem breve negest unssem vruntliken denste, apembaer tugende gutlikenn wetenne, dat de ersame her Johann, oldiges unsse mederadtmann, sick vor uns hefft beclaget, wo dat eyne juwer gnaden undersate, genomet Johan van Haren, borger to Emden, eme warafftiger schult van wegenne veer last Bremere beers achte unnde vertich Bremer marck schuldich sy, dar he eme under guden gheloven mede vorblyve, unde doch over langen tyden scholde hebben betalet genest, deme so nicht en sy gheschen etc., mit lengernne reden, so wy dar van eine berichtet sin; welckes geldes de vorscrevenne her Johan, oldiges unsse[*] mederadtman, so sine saken gelegen unde bewant sin, sus in egener personen uthtowesende nicht en kan irforderen unde bemanen, darumme hebbe he sodanne gelt unde schulde thodregen, upgelaten unde vulmechtich gemaket unnd jegenwardich in crafft dusses breves todrecht, upleth unnd vulmechtich maket dessem yegenwardigenn unnd erbarenn Folkuff Alkensone, hovetlinge to Inhusen, en toger dusses breves, dat van deme ergenanten Johanne van Horen, juwer gnaden undersate, in fruntschuppen to esschende unnde to entfangende edder mit rechte to bemanende unde uptoborende, darynne to donde unde to latende, vulmechtige quitancien unnd vorlatinge muntliken edder scriftliken darvan to gevende in mate offt unsse mederadtman dar personliken were, wesen konde unde sulven doen mochte, datsulve he deme ergenanten Folkuff, sinem vulmechtigen, lavet in unde crafft dusses breves, in allen thokameden tyden, stede, vast unnd unvorbroken, sunder alle behelp, nige funde unnd argelist, woll to holdenne; wore umme, gnedige leve junchere, wy denstliken bidden unnd begerenn mit andacht, juwe gnade dessem jegenwardigenn Folkuff Alkensone, gunstich, furderlick unnd behulpen sin wille, eme sodanne vorgerorde nastande gelt unde schult van deme ergenanten Johanne van Haren moge gutliken sunder vurder entholdinge wornoget unde betalet werden; dat vordenenn unnd vorschuldenn wy umme juwe gnade, de wy Gade deme Hernne wolmechtich bevelen, alle tydt willichliken in geliken edder merenn gerne. Des to tuge so hebben wy borgermestere unnd radtmanne erbenompt unsser stadt Bremen secretum witliken to dessem breve heten hangen. Gheven na Godes bordt verteynhundert yaer, darna in deme twe unde negentigesten yare, des donredages vor Praxedis, der hilgen juncfrouwen.
