| Nummer:oub1355 | Datum:Emden, 30. April 1493 | Overlevering:Editie | Vindplaats:Ostfriesisches Urkundenbuch, II, S. 383, nr. 1355 |
Häuptling Hicko von Gödens bekundet die Beilegung seines Streites mit der Stadt Groningen, unter Mittheilung der streitigen Punkte.
lk Hicko, to Godensen hovetling, bekenne unde betuge myt dussen mynen apenen besegelden breve, vor alle denghennen, de one seen off horen lesen, dat upt datum ende dach dusses breves is entlicken gesloten, bereden unde bestemmet in bywesendth des eddellen ende wolgebornen herenn Edtzardes, grevens to Ostfreslande, des erbaren unnde duchtigen Hero Maurices, hovetling to Dornum unde Wittmunde, Victor Vresenn unde anderen syner gnadenn ghetruwenn, des unwyllen tusschen deme ersamen rade der stad Groningenn unde my Hyckenn hovetling, herkomende van eynen genant Welter Schuttenmaker, als schipph unde gudt eynen, de Clauwess Kistemaker nohmende is, in wyse nabescreven, tom Damme wonafftych, van mynen denerenn Wolters wegenn angehold ende ouk anderen in Groningen unde eren bewynde wonafftich unde genomen ys. Ten ersten sal de radt der stad Groningen Wolter vorbescreven be... eyn vryg, vast, seker, strak geleide, unbefardt lyves unde gudes, vry aff unde an, uth ende to hus ses wecken langk durende, nademe dat geleyde to Emden kumpt sunder argelist, bynnen der stadt van Groningen unde landen to mogen komen, synes rechtes dar to vorfolgen, recht to nehmen, indem he eynen itlyken recht wedder ver... donde wordt, unde off he eynen itlicken dath nicht sull doen, mochte vry unde velich unbefardt wedder van dar to reysen. Ouk scholl Clauwess Kistemaker, so als he ghevangen is, syner vencknisse vryg unde quit wesen, unde des sael Clauwess vorb. unde de anderen, den in den totast wes ghenomen in, in Groningen unde Groninger bewynde wonafftich, nicht beth klagen noch manen der ghenomen gudere wegenn in gennen tokomen tyden up my Hycken vorg. offt mynen deneren na datum dusses breves haten noch veden, de den totasth ghedaen hebben, beholtlick denn van Groningen, unde de in oren bewynde wonende synnen, ores rechtes up Wolter vorb. Forderen is beredet, dat ik Hycko upgedacht, myne knechten unde undersaten, in der stadt Groningen, ore lande unde gebeden mogen komen, wanken unde vorkerenn vryg unde velich to allen tyden, wan one des gelevet, unde de van Groningen unde ore tobewanthe mogen vryg ende velich wedderumme in myn ghebede komen unde vorkeren to allen tyden, wan one des gelevet, unde schollen itlick den anderen, wor des to donde is, floten unde vorderen eynen itlicken in synen rechtverdigen bedrive behulplick wesen; ouk schal ik Hicko vorg. na dussem dage to gennen tyden nernande untholden in der van Groningen archste, off de van Groningen wedderumme in mynenn archstenn, indeme den klager mach ick unde recht wederfaren, ten sy zake dat erst over unde wedder over vorscreven sy up gelegelicke tydt unde stede to dage to komende, unde erkandt sy, we recht off unrecht hebbe, dar syck eyn itlick doen schall na wetten to hebben. Tho irkantnisse der warheit hebbe ik Hicko gedacht myn ingezegel an dussen breff doen hangen. Scheden to Emden, in denn jaer uns Heren dusent verhundert, darna im dre unde negentygesten, des neysten dinxdach na Jubilate Deo etc.
