| Nummer:oub1425 | Datum:1. Febr. 1495 | Overlevering:Editie | Vindplaats:Ostfriesisches Urkundenbuch, II, S. 438, nr. 1425 |
Der Emder Bürger Wybbe Boelsna verkauft den Vorstehern der Grossen Kirche zu Emden eine wiederkäufliche Rente aus seinem näher bezeichneten Hause für 25 Rheinische Gulden Kapital.
Ick Wybbe Boelsena, borger to Emeden, bekenne in dyssen apenen beseghelden breve vor alsweme, dat ick myt vrygen wyllen, nochterns moedes, hebbe myt vulboert myner moder Etten, vorkofft unde vorcoepe in cracht dysses breves rechtveerdiges vastes kopes voer mij ende vor mijne erven den beschedenen mannen Kersten Zijsenbotel, Egberde Scroder, Eme Meendes unde Ocken Boelsena, voerstanders der kaspelkerken Emeden, anderhalven enckelden golden Rynsen gulden jaerliker renthe ute unde van myner westerkameren, daer Hinric Alberdes mylder dechtnysse browhues entlick over de straten neghest steyt ynt westen. Daer ick to myner vuller noghe voer hebbe entfangen vijff unde twyntych enckelde golden Rynsen gulden; waerumme lave ick Wybbe vor mij unde voer mijne moder Etten unde vor unse erven unde anervent den vorben. voerstenderen dersulven kerken Emeden unde eren nakomelyngen elkes jares eens up unser leven Vrouwen avent to lechtmissen, alzodane anderhalven enckenden (!) golden Rynsen gulden wal to betalen, myt underscheede, dat ick Wybbe vorbenant unde mijn moder Ette unde unse erven int ewich moghen elkes jares unvorjaert up den avent unser[*] leven Vrowen to lecht- missen de anderhalven golden Rynsen gulden myt vijff ende twyntieh enckelde golden Rynsen gulden wedder qwijt unde affkopen, zo veer als dan de vorschenen renthe zij betaelt zunder erghelyste. Hijr hebben bij, an unde over wezen de beschedene manne Ludeke Scroder unde Rotger, baerscherer, tugheslude ropen unde beeden. In oerkunde der waerheit hebben ick Wybbe unde Ette vorbenant beeden den ersamen man heren Johanne Voerman, altariste der kerken Emeden, umme zijn eghene inghesegel, dat he durch unser vrentliker beede wyllen hefft wytliken doen hangen to dyssen breve. Int jaer unses Heren doe man screeff dusent veerhundert vijff undetneghentich, up unser leven Vrowen avent to lechtmissen.
