Home

Nummer:oub1451

Datum:Bredehorn, 27. Aug. 1495

Overlevering:Editie

Vindplaats:Ostfriesisches Urkundenbuch, II, S. 461, nr. 1451

Regest

Bischof Konrad von Osnabrück theilt den durch seinen Schiedsspruch, herbeigeführten Vergleich mit, der zwischen dem Bischof von Münster, dem Grafen Johann von Oldenburg, Ritter Hero von Dornum, sind Edo Wiemken einerseits und den Grafen Edzard und Uko von Ostfriesland andererseits nach Beilegung eines wegen der Münsterschen Ansprüche auf Emden u. a. m. entstandenen Streites geschlossen ist.

In den name des almechtigen Godes. Amen. Is durch den erwerdigen fursten unde heren, hern Conraid vam Retberge, bisschope to Osenbrugge, in den gebrecken tussche deme erwerdigen hoichgeborenen fursten unde heren, heren Henrick, bisschope to Munstere unde administrator der hilligen kercken to Bremen, den edelen unde walgebornen junckherenn Johanen, greven to Oldenborgh unde Delmenhorst, Hero van Dornum, rittere, Eden Wymeken, syner gnaden anhengeren, up eyne, und den eddelen heren Edzerde unde junchere Uken, gebroderen, greven to Oistfresslandt, an de andere syden wesende, eyn gutlick fruntlick scheyd bedegedingt, in mathen, formen unde wyse nabescreven. Also int erste de upgemelte furste unde here, bisschop to Munster etc. angetogen hefft unde anthut dat slot, stad Emeden myt syner tobehoringe unde entboringe, de darvan geschen unde entholden zolle zyn, mede berorende de geystlicken jurisdictien, de marckede to Oyte, Haselunne, Meppen unde Haren, ock tollen nigges vorhoget zollen zyn tegen undersaten des vorg. fursten, wowal dan de vorgemelten greven to Oistfresslandt ghyner redelicker sprake edder erfftal den vorgescr. fursten, bisschoppe to Munstere, syner gnaden vorfaren, stichte, capittelle edder landeschop an den benompten slotte unde stad Emeden nye bestaen hebben offt noch en bestan, hefft de vorbenompte her Conraid, bisschop to Osenbrugge, angeseen unde betrachtet forder grote swaerheyd, blotstortinge, vorderff der lande to beyden deylen, darvan noch irrisen mochte, in allem besten myt des erwerdigen hoichgebornen fursten bisschopps tho Munstere unde syner gnaden verwanten upgemelt an de eyne, unde den eddelen heren Edzarde unde junchere Uken, gebroderen, greven to Oistfresslandt vorg., an de anderen syden, erer aller concente, wettent, willen unde vulbord, gefunden unde bededinget, also beschedeliken, dat de vorg. gebrodere, greven to Oistfressland, hebben geleent unde leenen teyndusent Overlendesche vulwichtige golden Rinsche gulden deme vorg. fursten, bisschop tho Munster, in mathen nabescreven, also dat syn forstlike gnade, syner gnaden nacomelinge ende cappittell dersulven kercken to Munster, efft syner gnade medebescreven, nu noch nummermer ton ewigen dagen de vorbenompten greven to Oistfresland, er erven, anerven, nacomelingen, lande edder lude, umme dat vorscr. slott, stad Emeden myt syner tobehoringe belangen, bespreken edder besprecken laten sollen edder willen yenigerleyewys. Solcke summe der teyndusent goldene Rinsche guldene upgemelt deger, genslick unde alle in eyner allingen gensslicker summen van deme vorgescr. forsten, bis- schopp to Massiere, edder syner gnaden medebescreven den vurgeser. greven effte eren sandebescrevenen eyn jar tovornen in er seckere wysse beholt, unbeswert eniges infalls enn daranne behynderen mochte, tovornen weddergegeven unde erst wal betalt zynt sunder argelist. Ock forder up dat punct der jurisdictien des vurscreven fursten, bisschopps to Munster, berorende, ys bededingt, dat syner gnaden officiall in Fresslandt syner gnade geystlike aldaer jurisdictien bereysen, exerceren unde gebruken sall unde mach, als dat van oldes gewontlick ys gewest, emme daranne neyne indracht edder besperinge to geschende, unde dat men de markede, de men jarlix in syner gnaden lande to holdene unde vorsokene plecht, to Oyte, Haselunne, Meppen unde Haren, gebruken unde holden mach up gewontliken toll unde wechgelt, so de undersaten von beyden syden dat to holdende plegen, unde de undersaten an beyden syden myt ungewontliken niggen tollen nicht beswert zollen werden anders, dan van oldes gewontlick ys gewest. Myt den anderen gebrecken, int erste den eddelen unde walgebornen junckeren Johann, greven to Oldenborg etc., berorende unde den greven to Oistfresslandt vorbenompt unde Haro van Dornum rittere unde Eden Wymeken, der gebrecke halven tusschen enen allen vorg. sall eyn gutlick dach bestemmet werden van beyden fursten, bisschope to Munstere unde Osenbrugge vurgescr., effte erer gnaden reden, de sake unde gebreck to allen syden gutlicken to vorsokende, hentoleggene na ansprake unde antworde effte to drechliker utdracht na erkentnisse der vurgescr. fersten edder erer gnaden reden to stellene. So danne dusser gebrecke halver in maten bavengescreven vhede van den vorbenompten fursten unde heren, bisschop to Munster, unde van allen parthen so bavengescr. angestalt unde vorgekart was, de sal hyrmede gutlicken unde fruntlicken gescheyden zyn unde blyven. Hyrup van allen deylen zoene gegeven sunderlinx durch den gestrengen ende erbernen heren Godert Ketteler, rittere, van wegen des erwerdigen, hoichgebornen fursten, bisschoppes to Munstere etc. vorgescr., vor syne forstliken gnade, vor de eddelnen ende walgebornen junckeren Johanen, greven to Oldenborg unde Delmenhorst, Roleff, eddelheren to Depholte, Mauricius, greven to Speygelberge, Wilhelme, junckgreven van deme Berghe, Hero van Dornum, rittere, Eden Wymeken unde allen anderen syner gnaden tostenderen, anhengeren, undersaten, togedanen unde bewanten to behoff der greven to Oistfresslandt vurgescr., eren anhengeren, bewanten, unde undersaten, unde de werdige unde erbere mester Hycko van Dornum, pravest to Emeden, van wegnen der eddelen heren Etzardes unde juncker Uken, gebroderen, greven to Oistfresslandt vorgenant, wedderumme to behoff des erwerdigen, hoichgebornen fersten, bisschopps to Munstere vorgescr. siner gnaden anhengeren unde bewanten, so to allen zijden all eren tostenderen, anhengeren, undersaten, togedane unde bewanten gelyke zoene gegeven hebben des in jegenwerdicheyd des erwerdigen fursten, bisschoppes to Osenbrugge vorbnompt, erer eyn deme anderen in merer seckernisse hanttastinge van beyder part wegene gedaen hebben, allet zunder argelist unde geferde, unde offt syk enige gebrecke, infal edder behyndernisse an data dusses scheydebreves begeven edder erwossen, dat doch Got vorhoden wille, tusschen dusseme vurscrevenen fursten, bisschoppen to Munstere, unde den greven to Oistfresslandt unde ere undersaten to enigen deylen, aal nicht anders dan myt rechte angehaven, gefordert unde geendiget werden, unde ock offt gebreck tusschen den greven van Oistfresslandt, Hero van Dornum, rittere, Eden Wymeken myt eren anhengeren durch de vurg. fersten edder erer gnaden geschyckeden reden nicht gescheden en worden unde de part beyden edder er eyn neyn gehor geven effte inganck don en wolden, sall er eyn an den anderen doch nicht keren, he en do dat myt rechte effte na erkentnisse. Hyrup synt dusser scheydesbreve dre gelyckludende gemaket, gegeven unde vorsegelt in vestnisse van deme erwerdigen hoichgebornen fursten unde heren, heren Henrick, bisschoppe to Munstere unde administratori der hilligen kercken to Bremen, up eyne, unde den eddelen heren Etzarde unde juncker Uken, gebroderen, greven to Oistfresslandt andersyt, dussen vorbnompten scheyd stede unde vast unvorbrocken to holdene, des wy Henrick, bisschopp unde administrator vorgen., vor uns unde unse nacomelinge, anhengere vorgescreven, togedane unde bewanten, unse sigill hyran hebben doen hangen, unde wy doemdecken unde capittell der kercken to Munstere hebben des umme bede willen unses gnedigenn heren vurgescr. vor uns ende unse nacomelinge tor orkunde unse grote sigill by unses gnedigen heren segell hyran gehangen, unde wy Edzart unde Uke, gebrodere, greven to Oistfresslandt vorgescr., andersyt vor uns unde unse erven anhengere, togedanen unde bewanten unse segell hyran ock wytlicken hebben doen hangen, unde wy Conraid van Godes gnaden bisschopp to Osenbrugge, als eyn dedingesman dusses vurgescr. scheydes, unse segell ock to furder kuntschop der warheid an dussen breff wytlicken hebben doen hangen. Unde dusser scheydesbreve synt dre, eyn deme vorscreven fursten bisschoppe to Munstere etc., den anderen deme upgnanten fursten bisschopp to Osenbrugge unde den derden den greven van Oistfresslandt vurgescr. overgeven. Gegeven unde gededingt vor deme klostere to Brehorn, belegen in der herschop van Oldenborgh, in deme jare unses Heren do men screff dusent veerhundert viff unde negentich, ame donners tage na Bartholomei apostoli.

Recto:

«‹›»