Der Pfarrer und die Kirchvögte von Rysum und der Häuptling Keno von Loquard verkaufen zum Besten der Kirche in Rysum eine Reihe genau bestimmter Grundstücke an den Emder Bürger Bolardus von Jemgum.

Wy her Focke, kercher to Rysum, Keno Ockena, hovetling to Loqwarth unde im Ham, Egge Tammena unde Lyubbo Sybensna, advocaten der kercken Rysum, bekennen unde betugen apembar vermits dussem apenen besegelden breve vor alsweme, wo wy sampt eyndrechtigen mit guden vorbedachten mode unde vryen willen heben vercofft unde noch jegenwordich in krafft s breffs vercopen erfflick unde ewelick van wegen der kercken to Rysum teyn demede medtlandes, noch 1 achtendell vam demede unde eyn verndell vam grase meetlandes, belegen in Suderhuser hamrick, geheten inna Eell eckerum, eyn demeth unde eyn verndell van 1 gras, noch by den Hontiger weyschen 1 demeth, inna Hamm eyn demeth unde 1 verndell vam demeth, noch in Eystyuch dre demeth, eyn half demeth inna Krumme comp, noch inna lutke Syptyuch anderhalff demeth, inna grothe Syptiuch eyn demeth myn eyn achtendeell unde eyn demeth inna Herne, unde wesselt alle yare jagen eyn demeth inna Ockingewolt, deme ersamen Bolardo van Jemgum, borger in Emeden, Elzeken, siner eeliger huysfrouwen, unde orer twijer erven offt anerven, vor eyne tsumme van gelde, de welcke wy her Focko, kerckher, Keno, hovetling, unde advocaten vurscr., [*] bekennen, uns de erste penningk mit deme latesten van deme genanten Bolardo tho nuth unde behoff der ergemelten kercken to willen unde vuller genoge woll entrichtet unde betaelt is, des wy ome bedancken, unde loven ome unde sinen erven vor unss unde unnse nakomelinge in macht dusses sulfften breffs dusses vurscr. landes gude warscuppe to done vor alle ansprake geistlikes effte wartlikes gerichtes, wanner unde wo vakene on sulcks van noden to done mochte noden (!) sunder argelist. Tugeslude hijrto geropen sint gewest de ersame Aerloff, schriver, unde schipper Habbo van Fletum, borger in Emeden. To merer orkunde der warheit so heben wij her Focko, kercher, unde Keno, hovetling ergenant, mit consent unde vulbort der advocaten vurscr. unse ingesegel beneden an dussen breff gehangen. Datum anno Domini M^o CCCC^o nonagesimo sexto, in profesto Petri et Pauli gloriosorum principum.

x

x

Fonds	Ostfriesisches Urkundenbuch, II
Fol.nr.	S. 505
Nr	1497
Olim	Orig. Perg. im Archive der Gesellschaft für bild. Kunst etc. zu Emden.
Jaar	1496
Datumcode	vPetPau

x

x

Commentaar	Das eine Siegel ist gut erhalten. Es zeigt in einem Wappenschild rechts eine Vogelklaue nebst Flug und darüber eine dreizackige Krone, links eine Lilie. Umschrift: S. Fockonis curati in Rysum.

x

Materiaal	papier

x

Edities	E. Friedländer, Ostfriesisches Urkundenbuch II (Emden 1881), nr. 1497