| Nummer:oub1532 | Datum:28. März 1497 | Overlevering:Editie | Vindplaats:Ostfriesisches Urkundenbuch, II, S. 533, nr. 1532 |
Edo Wiemken fordert Graf Edzard auf, ihm mitzutheilen, ob die Gerüchte, dass er gegen ihn rüste, begründet seien.
Vrundtlyken gruedt thovoren. Eddelle unde wollgeboren besunder guede frundt. So sick juwe eddelheyde, so ick vorsta, myt eynen marcklyken tall van knechten nuw wedder scolen gestarcket hebben, so lopet de sage mannichfolt, alse dat juwe eddelheyde wedder scolden in menynge syn, my unde (de) myne boven gegangen sone, segel unde breve, unser eyn deme anderen gegeven unde van den ersamen reeden der beyder stede Bremen unde Hamborch uns undertwischen gedegedinget unde van on mede vorsegelt, wedder to besedende, des ick doch to juwen eddelheyden nicht en vorsie, sodanen vlochmeren nynen geloven gevende, sunder my up sodanen sone, segell unde breve, alinge vorlatende etc.; warumme is myn frundtlickes begere van juwen liefften to wetende, ifft ick unde de myne von juwe liefften unde de juwe ock scolen befaren; des begere ick juwe gutlicke andtworde by dussem jegenwordigen scrifftlick wedderumme. Datum feria tercia Pasce, anno XCVIIo.
