| Nummer:oub1554 | Datum:27. Juli 1497 | Overlevering:Editie | Vindplaats:Ostfriesisches Urkundenbuch, II, S. 552, nr. 1554 |
Heirathsversprechen und Bestimmung des Brautschatzes und der Leibzucht zwischen Graf Edzard von Ostfriesland und Gräfin Elisabeth von Rietberg.
To love unde eren der hilligen drivoldicheit, Marien der hemmelschen konyngynnen, unde salicheit der selen ouck wollgevalln der heren unde frunde nagescreven is tusschen den edlen unde wollgebornen heren Edzardt, graven to Oestfriesslandt etc., an eyne, unde der wolgebornen frowchen Elyzabeth, der edle unde wolgebornen junckern Johanns, graven tome Retbergen, unde Margareten van der Lyppe gravynnen dairselvest dochter, an de ander zijt, ein hillick echtschafft beredet, besproken unde gentzlichen gesloten in mathen nabeschreven: allso dat de vorgenompte grave tome Retbergen deme genompten graven to Oestfriesslanndt unde syner dochter egedacht to bruetschatte medegeven sall unde will vierdusent golden Rynsche gulden, unde se myt clederen, clennoden getemelicher wyse, so eyner gravynnen tobehoirt, well gezyret uitverdigen und ver- sorgenn. Des sall de obgemelte grave to Oestfriesslanndt myt synen leven broder, junckeren Uken, de vorgenompten gravynnen Elyzabeth, syne eliche vrouwen, myt einen rechten lyfftucht belyfftuchtigen unde besorgen, allso, weere id sake, deselve grave to Oestfriesslanndt voir Elizabeth, siner vrouwen, sunder rechten liveserven van orer beider live geboren na deme willen Gades almechtich vurstorve, dat Godt verhode, sall unde will de gemelte grave to Oestfriesslandt der egedachten Elyzabeth, gravynnen, eine erliche beqweme wonynge in den steden Emeden ader Norden bestellen, unde dairto alle jair dreehundert Rinsche gulden an gelde, unde noch voir eynhundert Rynsche gulden bottere, kese, speck, fleysch, korn unde andere leverantie vurnoghen unde betalen. Gelevede aver der gemelten gravynnen Elisabeth na affgange des egedachten graven in Friesslande nicht to wonen, dan weder dair uth reysen wulde, sollen oir alsdan desselven graven to Oestfriesslandt erven sodanne vierhundert Rynsche gulden jairlycher lyfftucht in vorgeschrevener wise volgen laten unde betalen, ader dairvoir, wanner des obgemelten graven erven belevet, in stede szodanner lyfftucht in einer szommen eins vurnogen unde betalen vierdusent golden Rinsche gulden, unde dairmede ouck oir cleder, clennode unde frowlyche gerechticheydt volgen unde theen laten. Unde dit wo voirgescr. hebben de obgemelten graven tome Retbergen unde Oestfriesslandt ein deme anderen by eren geloven unde gueden trouwen gesekert unde togesacht stede, vast unde unvorbroken to holden. Dusses sint dedingesheren unde frunde gewesen de hoichwirdige in Godt furst unde here, here Conraidt, bisscop tho Munster unde administrator der kercken to Ozenbrugg, de edle wolgeborne gestrenge unde erbern heren Everwyn, grave van Benthem unde to Stenvorden, Godart Kellner, ritter, Herbert van Sneetlagen, balier, Wenemar van der Horst, scholaster der doemkercken to Munster, rede unde frunde des voirgescr. vorsten unde heren, van wegen junckhern Johanns, graven tome Retbergen, Hero Maurijsz van Dornhum unde Victor Friese, van des gemelten graven to Oestfriesslandt wegen. Unde to merer vestnisse unde sekerheyt der warheyt synt deser breve twe glyckludende ein deme graven van Retbergen unde de andere deme graven to Oestfriesslanndt overgeven, vurzegelt myt anhangen segellen der voirger. graven van Retbergen unde Oestfriesslandt, als hovetsaken. Des wy Johann, grave tome Retbergen, voir uns unde unse erven bekennen so gededinget, gesloten unde van uns vursegelt is, unde wy Edzardt, grave to Oestfreysslandt, vor uns, unse erven in gelyker mathe bekennen so voirger. gededinget to sinde, unde derwegen unse segell beneden an desen brieff hebben doen hangen, unde wy Uko, grave to Oestfriesslandt, hebben alle unde itliche puncte, in mathen voirgescr. gededinget und geslotten, myt unsen leven broder bewilliget unde belevet, de vast, unvorbroken gelyck unsen brodere to holden, unde dairumme unse segell hir mede an by unsen leven broders segelt myt gueden willen doen hangen. Ime jair unses Herrn dusent vierhundert soven undtnegentich, amme donnerdage na Jacobi apostoli.[*]
