| Nummer:oub1601 | Datum:Sneek, 13. Aug. 1498 | Overlevering:Editie | Vindplaats:Ostfriesisches Urkundenbuch, II, S. 587, nr. 1601 |
Wilbold (?) von Schomburg und andere Bevollmächtigte des Herzogs Albrecht von Sachsen u. s. w. und der Grafen von Ostfriesland schliessen für ihre Auftraggeber, ein namentlich gegen die Stadt Groningen, gerichtetes Bündniss.
Wylbolt van Schomburch, ridder, ende de anderen gedeputeirden des dorluchtigen hoghgeborne ende mogeden fursten ende heren, heren Albrecht, hartogen van Sassen, lantgreve in Doringe, marckgreve to Myssen, gubernator ende potestatus in Vreeslant etc., tot ener syd, Asschewyn van Swychelde, Victor Vrese ende Matheus Nycamer, [*] alse volmachtighe deputirden van den edelen walgheborne heren, heren Edzart ende Uko ghebroderen, greven toe Oestvreeslast, ten anderen syden, bekennen openbaerlike myt dessen onsen yeghenwardighen breve, dat wy in den name ende van weghene ons vorg. gnedigen heren, haer gnade vrende, ondersaten ende vomanten ende adherenten, ene guetlike vrintlike confederacie ende verbont ingegaen, angenomen en sloten hebben in sulken maneren ende formen hyr navolghende. In den eersten hebbe wy an beyden syden ghelovet ende toghesecht, gheloven ende toseggen myts dessen onssen breve malkanderen alle hulpe ende bystant to done ende to bewysen by daghe ende by nachte ons an beyde syden mogheliek synde yegens de staede van Groningen, horen hulperen ende adherenten. Oeck sal onss gnedige here van Sassen offte wy, synre gnaden deputeerden, deghenen, de syck under onss vurscr. gnedigen heren den greven van Oestvreeslant gedaen hebben, van weghen des hylghen rikes nyet beschadeghen, beroven, branscattinge noch enighe unde doen offte laten ghescheen in eniger maniren, denselven holden, bescutten ende beschermen na onss vermoghen, alse gude ende truwe undersaten des hilghen rikes tobehoert. Oec angaende alle brantscattinghe ende composicie, de an beyden syden gedaen ende angenomen sullen worden up geenre syden van Gerkesbrugge, sal men deselve penninge daervan komende delen ende parten by ghelike parten ende na avenant van knechten an beyden syden in soldie ende deenst onderhalden sullen werden. Oec sall onss gnadige heer vorscr. offte wy als syne gnaden deputeerden den vorscr. greve van Oestvreeslant ende hoer lefften ondersaten by ghelyck ende recht beschutten ende beschermen, alse vrome greven ende ghetruwe onderdanen des hilgen rikes tobehoert, na onsen vermoghen, desghelikes stillen, sy ons wederomme alle hulpe ende bystant doen in den name des hilgen rikes, ende onss vorscr. gnedigen heren van Sassen hem luden mogelick sy. Oec hebben wy an beyden syden gelovet ende togheseeht, geloven ende toseggen in den name van onss gnedigen heren vorser., dat wy mytten vorg. van Groningen, haren hulperen ende adherenten gene peys, bestant ofte dedinghen in geenre wys angaen, annemen noch holden suhlen, het en sy by wille ende consent van beyden syden, alse truwelick ende ongefeerlick; welke vorscr. punten ende artikelen, gheloefften ende verbont bovengeroert wy gedeputeerden en volmachtige vorscr. gelovet hebben ende geloven in den name van onss vorscr. gnedigen heren gansliken vullenkomelick to onderholden ende do doen onderholden, na alle hoer formen ende inholden. Des tot oerkunde hebben wy van twe geliken cedelken myt malkanderen van worden tot worden concorderende ut doen sniden, von welken wy Asschwyn van Swychele myn seghel ende hantteken ende Victor Vreese ende Matheus Nyecamer[*], volmachtige van onss gnedige heren den greven van Oestvreeslant, onss seereet hyrunder gedrucket ende hantteken hyronder gestalt hebben ende de gelovet in handen van den gedeputirden onss vorscr. gnedigen heren van Sassen vorscr. Ghedaen bynnen Sneek, den 13. dach van Augusto, anno XCo. octavo.
