| Nummer:oub1723 | Datum:10. März 1400 | Overlevering:Editie | Vindplaats:Ostfriesisches Urkundenbuch, II, S. 677, nr. 1723 |
Die Preussischen Städte melden an Herzog Albrecht von Holland, dass Keno tom Brok versprochen habe, die Vitalienbrüder von sich zu lassen, und dass sie, wenn das nicht geschehen sollte, dieselben in Friesland oder wo sie sich sonst befinden, aufsuchen wollen, und begehren, dass er es den Ihrigen nicht verübeln wolle, wenn sie denselben in seine Herrschaft folgen sollten, sondern ihnen Hülfe leiste.
Post salutacionem. Hochgeborne vorste unde gnedige here. Alse juwe gnade wol irkennet unde vake vornomen heft, dat de gemene kopman van allen landen unde steden to der zee wart zere grotliken unde swarliken van den vitalienbruderen, de in Vreslande ere tovlucht hebben, beschediget is, unde wert noch alle dage: des in uns to wetene worden, dat Kene, her Ocken sone tom Broke, desulven vitalienbrudere by sik heft unde heft den gemenen steden van der henze to Lubic vorgadert gelovet, dat he se van staden an, to lande unde nicht to watere, van sik laten wil. Weret over sake, dat id nicht en schude dat God vorbede, so is unse here homeistir mit uns to rade worden, dat he unde wy mit ganczer macht unde mit hulpe alle dergenen, beyde van heren unde steden, de darto helpen willen, desulven vitalienbrudere in Vreslande oft anderswor, dar des behuff is, suken willen, volge uppe se to dunde, war me se voreschen unde irvaren mach. Hirumme, allergnedigster here, oft nu de zeerovere vorvluchtich wurden, in juwe lande, herschop, strom oft havenen wor quemen, unde van den assen unde eren helperen dar gezocht wurden, so bidde wy juwe plegelike gnade, uns, den assen unde eren helperen dat to arghe nicht to kerende, sunder hulpe unde rat en darto to dunde, dat de zeerovere vorstoret werden etc. Scriptum etc.
