| Nummer:oub1788 | Datum:20.-30. Mai 1442 | Overlevering:Editie | Vindplaats:Ostfriesisches Urkundenbuch, II, S. 746, nr. 1788 |
Extrakt aus dem Hanserecesse zu Stralsund.
Aus dem Hanserecesse zu Stralsund ... Vortmer vor den ersamen radessendeboden de ersame her Hinrik Koting, borgermester, sendebode van Hamborch, gaff vor alse van den kosten unde deme ghelde, des ere stad noch to achter were alse van deme slote to Emeden, dat doch geschen were umme der stede ende des gemenen copmans willen, unde was begherende, dat de stede darumme spreken unde darup vorsinnich weren vor ere stad unde in wat wise se der kost zik mochten benalen. Deme de erbenomeden radessendeboden so gherne deden unde na besprake em seden: leve her borgermester, wowol na juwes rades begerte de ersamen van Lubeke den Lifflandesschen unde Prusschen schreven van den vorscr. puntten, se ere sendeboden darmede uppe desser dachvart to belastende, jodoch so se uns segghen, qwemen en sodanne breve to spade unde de dach alrede was gesleten, so dat se unde ok mer stede van der weghen nen bevel hebben, und willen dat gutliken bi ere oldesten bringhen. Unde desgelikes wart ok den van Lubeke und Hamborg gheven vor en antwert, do se seden van dem biscoppe van Munster, alse umme dat slot Emeden willen, wente de biscop begerde daghe, dede gheld wolde kosten to holdende, wente de erbenomede here biscop van Munster menet ene draplike summe gheldes to hebben, unde seden, se wolden dat ok bii ere oldesten bringhen.
