| Nummer:ugk050 | Datum:14. Okt. 1472 | Overlevering:Abschrift | Vindplaats:Grimersumer Kiste, inv.nr. 050 |
Der Pfarrer und die Kirchenvorsteher von Grimersum verkaufen dem Häuptling Aild Beninga daselbst 2 2/3 Grase Landes fär 31 alte Rhein. Gulden, um mit diesem Erlöse eine Glocke anzuschaffen.
Ick her Tyarck van Reyden, kerchere tho Grymetzum, du wytlick unde kundych [*] allen ersamen guden luden, de dissen breff seen offte horen lesen, wo dat ick unde myn hilghen mans, als Mammo unde Syart, unde myt consent unde vulbort unser buren, hebben vorkofft Ayld Benynga, unsen hoefftlynck, twe grase tyllandes ende een sestendeel, gheleghen in Toentyuch, [*] ende een halff gras in Wyrder hammerck gheleghen, dat ys hoeplant, vor enen summen gheldes, als een unde dartych olde Rynsche ghulden, umme ghebreck unser klocken, de spyse mede tho betalen. Dyt vorghescreven ghelt ys vul unde al wal betalt de erste pennynck mit deme lesten. Darumme scheide wy vorghescreven Tyaricus unde hilghen mans [*] Ayld Benynga vorscreven dyt vorscreven lant vry unde quijt vor al ansprake, zo he dat mach bruken unde erven synen erfnamen. Hyr weren an unde over her Haytet, vycarius tho Grymetzum, Focko Wysselna, Wyltet Ennenna, Apke Eggenna, Reynd Ebbenna ende anders vel guder mans. In sen oerkunde [*] dysser warheyt zo hebbe ick her Tyarck myn ingheseghel an dissen breff ghehanghen. Anno Domini MoCCCCoLXXIIo, in die Calixti pape et martiris.
