| Nummer:ugk053 | Datum:17. Juli 1471 | Overlevering:Original | Vindplaats:Grimersumer Kiste, inv.nr. 053 |
Ette Johannesna verkauft an Acke Sunken ein Diemath Weidelandes in Feydeneland.
Wytlyck kundych unde apenbar sy allen erbaren erlyken unde guden luden, beyde geestlick unde wertlick, de dussen apenen besegelden [*] koepbreff zeen edder huren lezen, dat ik Ette Johannesna, myt vryen walberadens unde unvordrunckes modes, stantafftyghes kopes jegenwordych in cracht unde macht dusses apenen besegelden [*] koepbreve vorkope unde hebbe [*] vorkoeft Acke Sunken eyn demet meedlandes in Feydenelant [*] vor ene summen geldes, also wy van beyden parten synt eyns geworden. Welke summe geldes my Etten benomet de vorben. Acke degher, al unde wal hefft betaelt, dat ik em dancke, to mynen willen, den erste pennynck myt den lesten, unde den mynnesten myt den meesten, warumme ik Ette vorben. myt consent mynes mannes unde aller vrunde deme vorben. Acken dat vorben. lant thosta unde vor alle rechte wissen unde vry holden wil to wedder vorkopen, vorsetten unde vorwesselen, wo vake em des noet unde behoeff ys, vor alle ansprake, boren off ungeboren, de synt off mogen komen sunder alle argelist, hulperede edder jenigerleye nye vunde, dar men breve mede dencket to straffen. Hir hebben mede an unde over gewesen vor tuchlude, een tuchnysse der warheyt to sproken vor alsweme, als tovor gescreven is, heer Haynch, eyn begeven prester des orden sunte Johannes to Abingwer, unde Dude, burman und inwoner to Lopsum. In orkunde merer tuchnysse der warheyt hebbe ik Wiltinck Mensena, kerckere to Lopsum, myn ingesegel witlick gehangen beneden an dat spacium dusses breves. Gegeven unde screven na de bort Christi, do men scref dusent veerhundert unde een en seventych, up sunte Allexius daghe.
