Berent Morreaens schulte te Hasselt oorkondt, de abdij van Dickenijnghen te hebben gevestigd in Haghedoerns-gued ter Lanchorst, waaruit zij eene rente van 6 stede mudden rogge trok.

Allen luden, die dessen brief solen sien ofte horen lesen, doe ie verstaen, Berent Morreaens, schulte to Hasselt, dat voer my sint ghecomen, daer ie sat in enen ghehegheden heymale, her Johan, die abt, ende dat convente van Dickenijnghen ende hebben dat mit rechte verwonnen, dat ie sie gheweldighet hebbe van mijns heren weghen van Utrecht mit ordel ende allen rechte in Haghedoerns gued ter Lanchorst, daer sie zes stede mudde -rogghen over hadden jaerliker renten na holdenisse oere brieve, in alsulken manyren dat die abt ende dat convente voerscreven des alinghen guedes to der Lanchorst voerscreven ewelike ende ummermeer mit rechte ghebruken moghen. Hier weren over ende an als guede koernoten Tyde van Ywehorstincveen, Johan Abelinghe, Clawes Ludensone, Clawes Wittickens, Coep Rensedes, Rolof Gosinghe, Hermen Tovank, Arnt Starke, Hillebrant ter Haren ende vele gueder lude. In kennisse der waerheit heb ie Berent voers. dessen breef beseghelt mit minen seghele. Ghegheven int jaer ons Heren MCCC vijf ende seventich up sente Johannesdach to middesomer.

x

x

Archief	Drents Archief
Fonds	Arch. Abdij Dikninge
Toegangsnummer	440
Inventarisnr.	1
Fol.nr.	fol. 36r
Regestnr.	97
Jaar	1375
Datumcode	NatJoh

x

x

Materiaal	perkament

x

Edities	O0636