| Nummer:dik119 | Datum:21 okt. 1385 | Overlevering:Afschrift | Vindplaats:Arch. Abdij Dikninge, inv.nr. 1, fol. 52v, reg. 119 |
Herman WeREMBOUDEssone en Grete e. 1. verklaren schuldig te zijn aan het klooster te Dickenijnghen 20 oude gouden schilden. Met bepaling omtrent de uitkeering en toekenning van het recht om het geld met geestelijk recht in te vorderen. Met bezegeling door hun pastoor en Marten, priester te Zwolle.
Wy, Herman Weremboudes sone, ende Grete, mijn wittelike wijf, maken kund allen luden, die dessen brief solen sien of horen lesen, dat wy schuldich sin van gherechter scout den cloester to Dickenijnghen ende den convente twijntich oelde guldene schilde gued van golde ende gherecht van ghewichte of ander guet payment daervoer als in der tij t der betalinghe ghenghe ende gheve is in der stad to Swolle, te betalen den cloester ende den convente voer-screven. Als tot welker tijt Herman of Grete voerscreven enich aflivich worde, soe solde die ander, die dan levendich bleve, bitalen den cloestere voerscreven tyen oelde guldene schilde of payment als voers. is. Ende wanneer dat die ander storve, so solden die erfgenamen, die dan bleven, bitalen die ander tyen oelde schilde. Ende weert sake, dat dit voerscreven ghelt elc op sinen termijn niet bitaelt en worde als voerscreven is, soe mochte dit voerscreven convente dit voerscreven ghelt ons of onsen erfgenamen ofpenden an alle onse guet oft sie mochtent mitten ghiesteliken rechte winnen sonder arghelist. In oerkunde der waerheit, want wy, Herman ende Grete voerscreven, selven ghien seghel en hebben up desse tijt, soe hebbe wy ghebeden heren Reynold, onsen kercheren, ende heren Marten, priester to Zwolle, dat sie dessen brief voer ons beseghelen. Ende wy, her Reynold cureyt voerscreven, ende her Marten, priester vornomt, um bede willen Hermans ende Greten voernoemt hebbe wy onse seghele voer hem an dessen brief ghehanghen. Ghegheven int jaer ons Heren MCCC vijf ende tachtentich up der Elvendusent merteleer dach a).
x
| Archief | Drents Archief |
|---|---|
| Fonds | Arch. Abdij Dikninge |
| Toegangsnummer | 440 |
| Inventarisnr. | 1 |
| Fol.nr. | fol. 52v |
| Regestnr. | 119 |
| Jaar | 1385 |
| Datumcode | XImVir |