Burgemeesters en raad te Groningen verklaren dat Boele van Westerwolde verhuurt aan Herman Raet en Fenne, echtelieden, een behuisde hofstede, gelegen tussen de Boteringepoort en de Ebbingepoort.

Wy Borgemesteren ende Raed in Groningen bekennen ende tugen mit dessen
openen breve Dat vor ons is gecomen Boele van Westerwolde ende bekande
dat hie hefft verhuert ende verhuerde vor em ende vor synen erffgenamen Herman Raet
ende Fenne synen echten wive ende ore twijer erffgenamen een hoffstede daer een huus
opp stiet tot eewiger hure Des iaers vor twe Arnoldus Arnhemse gulden als nu
ganachtich synt op Datum des breves offte payment dat daer guet vor is
errliken toe betalen jaerlix als stadrecht is Boelen vorscr. ende synen erffgenammen Mit
vorwarden off Hermen ende Fenne vorscr. offt hoer erffgenamen Dat vorscr. huus op ter
hoffstede vorscr. getymmert vercopen wolden in toecomenden tyden Dat Boele vorscr.
ende sijn erffgenamen die naesten daer toe moegen wesen toe copen offt hem genoe-
get Vor soe voele als dan een ander daer dan wil vorgeven Dit vorscr. huus
mitter hoffstede is gelegen an onser stad muren tusschen Botteringe poerte
ende Ebdinge poerte daer Boelen vorscr. huus ende erve naest by licht op den oester
zijd ende Wemele Boelens ende salighen Hinrick Boelns erffgenamen huus ende erve opp dat
wester zijd Dat orkonde wy mit onser stadzegel Gegeven inden iaer ons heren
Dusent veerhondert soven endedertich In sunte Lamberts avent doe Ludolf
Sicking Lubbert Leewe Folkeer Maurissing ende Ludeken Everts soene Wigbolds
Borgemestere weren onser stad.

x

x

Archief	Groninger Archieven
Fonds	Kloosterarch.
Toegangsnummer	172
Inventarisnr.	20
Fol.nr.	fol. 052v
Regestnr.	172
Olim	Arch. Klooster Selwerd, inv.nr. 1, reg. 43.
Jaar	1437
Datumcode	vLamber

x

x

x

Materiaal	perkament