Propst Hisko von Emden und Häuptling Folkmar Allena zu Osterhusen beruhigen die Bremer wegen vermeintlicher Rüstungen gegen die seefahrenden Kaufleute.

Unsen vruntliken grot tovorn, leven gueden vrunde, iu ze ghenoecliken to weten, dat wy iuwen breff wol hebben vorstaen inholdende wo dat hir itlike lade ziin, de zik vorgadderen to Valren in unser ghebede, der ere menynghe zy teghent iu rofschepe ut to makende to der zewart, dat den steden unde dem kopmanne to groten schaden mochte kamen, geliken iuwe breff myt meer worden in helt; waroff, leven vruonde, wy iuwer bescheydenheyt begheren to weten, dat wy in unser gebede al zulke lude tieghens dem kopmanne nicht willen holden unde alzodaner samelinghe myt allen nicht willen steden to vorgadderende, unde hir ut to zeghelende dem kopmanne to beschedigende, behalven up de Hollanders unde up de stichtes nothen[*] van Utrecht, de unse openbare vygende zint, unde de dar unsen underzaten in ener unvorzegede veede unbegropleken schaden hebben ghedaen, als yt iu unde allen gueden luden ys wol witlych unde kuendich. Meer unse breve, de wy den menen steden hebben beseghelt, de menen wy unde willen ze truweliken unde vruntliken holden myt vullencomeliker gunste deme kopmanne behulplech unde vorderlich to wesent, wor dat wy des macht hebben beyde to lande unde to water, alle argheliist utghezeghet. Varet wol in Gode. Screven des mitwekens to vastelavent, ander unsen segelen.
Hysko provest ende hovetlinge to Emeden,
Folcmar Allana hovetlinge to Osterhasen
iuwe guede vruende.[*]

x

x

Fonds	Ostfriesisches Urkundenbuch, I
Fol.nr.	S. 144
Nr	170
Olim	Nach dem Orig. (Papier) im Archive zu Bremen.
Jaar	1400
Datumcode	EpVastav

x

x

Commentaar	Die Siegel sind abgebröckelt.

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 170