| Nummer:oub0226 | Datum:Hamburg, 17. Dez. 1411 | Overlevering:Editie | Vindplaats:Ostfriesisches Urkundenbuch, I, S. 189, nr. 226 |
Johann Bekerholt aus Lübeck und Gerbert Gultzow aus Hamburg quittiren dem Rathe zu Hamburg über 100 Englische Nobel, welche sie für Keno tom Brok, der sie ihnen schuldete, empfangen haben.
Wy Johan Bekerholt to Lubeke unde Gherbert Gultzow to Hamborch borghere bekennet openbare an dessem breve vor allesweme, dat uns de ersamen heren, de raed van Hamborch, van des duchtighen mannes weghen junkher Kenes hovetlinges to dem Broke vruntliken entrichtet unde wol betalet hebben hundert Engelsche nobelen, de uns Kene vorscr. samentliken schuldich was na utwisinge synes openen bezegelden breves. Welke hundert nobelen wy gentzliken unde to voller noghe entfangen hebben unde dancken dem raede unde Kene vorbenomed guder betalinghe. Unde wy laten myd wolberadenem mode unde gudem willen den raed unde ere nakomelinge, Kene unde syne erven samentliken unde besunderen vor uns unde vor unse erven van der ergenanten summen penninghe quit, leddich unde loez myd craft desses breves. Unde hebben darup deme rade vorscr. to Kenes truwe hand desselven Kenes opene bref myd gudem willet wedder gheantwerdet. Unde to merer tuchnisse desser vorscr. stucke hebbe wy Johan Bekerholt unde Gherbert Gultzouw unse ingezegele wiitliken vor dessen bref gehenget. Gheven to Hamborch na Godes bord dusent verbunden, darna in dem elften jare, des donnerdages na sunte Lucien daghe, der hilghen juncvrowen.
