| Nummer:oub0245 | Datum:26. März 1415 | Overlevering:Editie | Vindplaats:Ostfriesisches Urkundenbuch, I, S. 201, nr. 245 |
Die Stadt Groningen verbündet sich mit einigen Friesischen Landschaften gegen Keno tom Brok und die Vetkoper.
Wy borghermesteren, raet, hoeftmans, oldermans ende mene meente der stad van Groningen, ende wy rechters ende mene meente van Fivelghelande, van den Halven Ampte, ende van Middoech doen kundich allen luden mit dezen openen breve, dat wi mit mallickanderen overdraghen ziin alsodaner punten als hiir na gescreven staen. Int eerste, dat wy vry ende Vreesch mallickanderen beschermen willen mit live ende mit gode teghens Kenen van den Broke ende teghens alle Duetschen heren, ende dat onser negheen deding angaen en sal, ten sie bi des anders weten ende wille. Voert meer waert sake, dat den van Fivelghelande, van den Halven Ampte, of den van Middoech, jenighe noetsaken anlegen, daer sie onser stad hulp to behoveden ende sie ons dat kundich deden, so wille wy hem to hulpe comen mit al onse macht up ons selves cost ende aventure. Ende desghelykes, waert sake, dat der stad van Groningen vorsr. jenighe noetsaken anleghen, daer sie des landes hulpe to behoveden, ende sie ons van Fivelghelande, van den Halven Ampte ende van Middoech dat weten leten, so willen wi hem te hulpe comen met al onser macht up ons selves cost ende aventure. Voert meer waert sake, dat dar jement were in den lande, de nicht doen en wolde des landes beste, off de vry ende Vreesch gheliie, ons nicht beschermen en wolde ende de van Groningen den berichten wolden, so willen wi van Fivelghelande, van den Halven-Ampte, ende van Middoech den van Groningen to hulpe comen mit al onser macht, up ons selves cost ende aventure, als vorsr. is; ende elc vier gyselen in Groningen senden, de sie kesen ut unsen lande off ampten, ende die in Groningen to bliven totter tiit, dat de reyse ghedaen is. Voertmeer so loven wi uitter stad van Groningen de van Fivelghelande, van den Halven-Ampte, ende van Middoech, to beschermen in al horen rechte ende vriiheit deer sie hiir to gebruket hebben na al onser macht. Ende des gheliikes love wy van Fivelghelande, van den Halven-Ampte, ende van Middoech de van Groningen to beschermen ende starken in al horen rechte ende vrieheit, deer sie hiir to ghebruket hebben na al onser macht. Ende deze vorsr. punten love wy mallickander stede ende vast to holden bi ener pene van dusent older schilden. Voertmeer so ziin wi vordraghen, dat men de renthe ende hure van Onsta guede, so waer dat sie gheleghen ziin, bekummeren sal also langhe, als Onsta buten lande ziin ende se mitter stad ende mitten lande nicht vordraghen en ziin. Ende deze vorsr. renthe ende hure sullen to hulpe comen der stad van Groningen ende den landen, de mit hem to vallen, des landes beste to radene ende de vrii ende Vreesch to beschermen, soldie mede to betalen, ende der stad ende lande oirbaer mede to done, totter tiit als vorsr. is; ende Onsta boden nemende to rechte to staene also langhe, als Onsta buten lande ziin. Voertmeer waert sake, dat Kene van den Broke jenighe schaden dede in rove, in brande, in vanghenscap ende doetslaghe, off in jenighe guede der stad van Groningen, den van Fivelghelande, van den Halven-Ampte, off den van Middoech, of jenighen landen de mit ons to vallen ende tot ons verbunden, gheliic als wi ons vorbunden hebben, den schaden sullen beteren deghene de an deze ziide der Emese horen, de Kene vordedingen wil. In orkunde der waerhcit hebbe wi borghermesteren ende raet vorsr. onsen stad seghel, ende wi rechters ende meente van Fivelghelande onses landes seghel, ende wi rechters ende meente van den Halven-Ampte ende van Middoech onse amptes seghele, an dessen breef ghehanghen. Ghegheven in den jaer ons Heren dusent vierhundert ende viiftiene, des dinxedaghes na palmesondach.
