Adda Folkmersna zu Hinte legt testamentarisch Rechenschaft über ihre Verwaltung ab und beschwört die Richtigkeit, worauf die Pfarrer zu Hinte bekunden, dass Adda zur Bekräftigung der Wahrheit in der Kirche zu Hinte das Abendmahl genommen habe.
Wytlyck ende openbaer sy allen luden myt dessen openen breve, woe dat yk Adde Folcmersna wonende to Hynte by der ghenaeden Godes inyt guden ghedachte myt gueden synnen ende ghesunden lyve wyl doen ende doe myn rekenschap ende myn testament, alzo als ic nu tor tiit na datum desses breves byn gaende, staende ende etende myt Godes machte, des so wyl ic myn ende myne zyele voerwaren, up dat myne kyndere ende hore vren den nae mynen dode myt en nenen menschen dye der ghelevet hefft, levendych ys, ofte levendych werden sal en ghene schelinghe of twydrachticheiden hebben, ende derven so make ic myn rekenschap ende testament in alsulker manyren als hiir na bescreven staed. Int iirste alzo als unse muerhues leyder verbrant was, dat kostede my weder to makende viiff styghe older schilde. Voertmeer so ghaff ic Affen Benyngha veer guldene umme waghenschot.[*] Item seven guldene umme cruem steen to Oesteel[*] van horen hylighen ghecoft. Item umme baem holt 14 schillinghe. Item to der graft to gravene veertych guldene. Item to der brugghen 12 guldene umme dat holt dat wy coften van unsen hylighen, dat hebbe ic wal betalt. Item so hebbe ic ghegheven myt dwanghe ende myt unrechte Adden Keensna, vrou Dyuerldes dochter to Norden[*] sestych gulden von hores landes weghen, daer ic en ghene huer van up ghenaemen en hebbe. Item twyntich marke hebbe ic uetghegheven van uetschoet umme Adden Keensna vorscreven ende unser twyer landt to den syle to Oesterhuesen. Voertmeer als my gheseghet ys, dat Hayka Dydykana to Pewesum over my claghet, als van hores vaders guede, dat ik des solde ghenaeten hebben, des ik unschuldych byn ende ock van en gheenreleye sake hoer nyet schuldych en byn. Item Elleke, Ennen Haytatsna vrou to Hlerte, [*] de hadde my ghedaen dertych guldene, daer ic hoer zyele mede ghedenken solde, de yk aelyngh[*] uetghegheven hebbe den veerbyddenden oerden ende anderen cloesteren ende presteren de in den lande gheseten synt. Dyt voerscr. Rekenschap ende desse voerghenaemede puncten hebbe yk ghemaket na salycheyt mynre syelen ende wyl darup sterven, dat yk al recht gherekent hebbe. Alzo helpe my Godt ende siin hylighe sacrament, dat yk daerup beghere to untfanghen ende alle syn leve hylighen. Hiirumme over desse voerscr. saken to eenre meere vestenisse, so hebbe ik Adde voerscreven ghenaemen to tughen ende to waersegghende heren Ulfarde ende heren Uden myne kerckheren, ende Campen Eppena, Remede Rycolfsna, Meert Eembana, Beno Bonnen zoen. Ende des so hebbe wy her Ulfardt ende her Udo prestere voerscreven umme vrou Adden Folcmersna beden wylle unse seghele an dessen breeff ghehanghen. Voertmeer so tughe wy presteren ende bure voerghenoemt myt unsen naemen. Woe dat vrou Adde Folcmersna voerscreven hefft gheghaen myt ghesunden lychame ende guden synne in unse kerke to Hynt, des manendaghes na Reminiscere in der hyligher vasten na datum desses breves, ende hefft dat hylighe sacrament daerup untfanghen umme desse vorscreven rekenschap ende puncten waer ende rechtfeerdych to maken by hoere syelen, daer wy by, ende an, ende over ghewesen waer ende anders wele gueder waerachtigher lude, dat wy betughen myt unsen seghelen, als daer ys voerghescreven. Ghegheven in den jaer unses Heren duzent veerhundert ende enentwyntych, des wonesdaghes na Reminiscere in der hyligher vasten.
x
| Fonds |
Ostfriesisches Urkundenbuch, I |
| Fol.nr. |
S. 249 |
| Nr |
288 |
| Olim |
Nach dem Orig. im Besitze der Gesellschaft der bild. Kunst etc. zu Emden. |
| Jaar |
1421 |
| Datumcode |
EpRemini |
x
| Edities |
E. Friedländer, Ostfriesisches Urkundenbuch I (Emden 1878), nr. 288 |
