| Nummer:oub0646 | Datum:1. Sept. 1452 | Overlevering:Editie | Vindplaats:Ostfriesisches Urkundenbuch, I, S. 562, nr. 646 |
Urtheil in dem Streite der Häuptlinge Imelo und Haro zu Hinte wegen des Nachlasses der Adda Kenesna.
Witlick, kundich ende apenbaer syt allen den genen, de dussen breef seen edder hoeren lesen, wo dat daer was enerleye kyf ende twydracht, als tusschen olde Imelo ende Haro Frederikes synen oem, hovetlynge to Hynte, in dusser nabescrevenen wyse, als dat se quemen voer unsen genedigen junckeren, juncker Ulryck to richte, als umme zalighe vrou Adde Keensna erve, borch ende goeder al waer dat se gelegen weren myt meer woerden. Des quam juncker Ulrick vorscreven ende wysede se in eyn lantrecht. Dusses quemen Imelo ende Haro vorscreven by uns Beno ende Eert lantrichters, ende brachten Egbert de voget mede, daer wy van unsen genedigen junckers wegen, des wy samptlyken reden ende vonden, na clage ende bewys als Imelen ende Harens in lantrechte ende myt lantrichte, Haren vorscreven int besit al salige vrou Adden goder, borch ende lant, waer dat de gelegen syn, unde Imelen daer aff. Tot ener merer vasticheit dusses breves, so hebben wy Eert ende Beno vorscreven unse ingesegel witliken beneden an dussen breeff gehangen. Int jaer uns Heren MoCCCCoLIIo, des dages Egidii abbatis.
