| Nummer:oub1118 | Datum:18. Juli 1483 | Overlevering:Editie | Vindplaats:Ostfriesisches Urkundenbuch, II, S. 195, nr. 1118 |
Letztwillige Verfügungen des alten Ulbet zu Wiesede.
In nomine Domini Amen. In deme jare unses Heren, do men screef Mo CCCCo LXXXIIIo, heft olde Ulbet to Wysda[*] gheset syn testament vor deme hyllyghen sacramente unde veler goder lude, by namen Campo to Wysda, Alghest syn husfrouwe, Syade darsulvest, junghe Ulbet unde ander vele goder lude, wal dat he was kranck an deme lychame, doch was he vulmechtych syner synne unde conscien; so bevoel he yn dat Gode syne zelen unde der erden den lycham; darneghest syne rekenschup, inschult unde utschult: Int erste ys he schuldich Eden to Wadwert 5 krumstert myn wen 10 Arensgulden Ostergheldes; Ette to Ostermodens ys em schuldich 8 Ans. golden Ostergheldes; item so claghede he lame knoken up Ede Aytets to Yever, als ene lame hast unde ene grote wunden yn dat hovet unde 3 wunden yn dat lyf, unde so schloech he em wedder enen tant ut dem munde, als et Nanne, scryver to Yever, wytlyck ys. Item so ys Wylgryp to Wadwert synen sone Gherelde schuldich 3 Arn. gulden Ostergheldes vordeent loen, unde so ys he em wedder schuldich van synes brodersones weghen 3 Arn. gulden Ostergheldes. Item so ys he schuldich Wadwerder hyllyghen 3 Arn. gulden Ostergheldes unde 2 krumstertt Item Mynneke to Wadwert sloech em ene wunden vor den kop, als 3 kretelen entwe; item so stont he to, dat he Tyarck Ydzyken to Ztynnelstede hedde slaghen mytten broetmeste yn da. lyf, unde dat dede he um syner husfrouwen wyllen, der sprac he in ere eere. Item Ulbet unde Luderd to Fronhusen wundeden malcanderen, Ulbet krech syne wunde in de borst, Ludert yn de schulderen, dar synt borghe tuschen Ryncke Albertes unde Wylgryp.[*] Item so ys he Teyte bouknechtes sculdich een ramundeslaken, dar ys ynne betalet 7 Arn. gulden Ostergeldes. Item so ys he Reynt to Bacbant[*] schuldich een ramundeschlaken, dat he em lende, so was he bekant by zyner zelen salycheyt, dat he Eyen Wyltets to Bacbant were schuldich 2 Arn. gulden unde een tunne Ammersches, unde so heft se wedder van em ene ko, de se mytterwelt heft beholden vor dyt ghelt. Item so ys he Lyubbe Tyadeken to Holtorpe[*] schuldich 12 krumstert myn den 12 Arn. gulden. Item so ys he Wysder hyllyghen schuldich 4 kr. myn den 19 Arn. gulden. Item so was he bekant, dat her Fulf kynder unde her Popke mochten nycht komen yn dat erve to Wysda; sunder by Nortwysda een huslant unde by der Duvelshorne een huslant, dar moghen se mede tokomen, als men dat rekenen kan. Item so was he bekant, dat he scholde hebben to Wysda van angheboerne rechtwerdichliken 5 huslant myt erve unde werve, unde so bevoel allest Campen, syner peyen dochter, den derden part van all dessen erve, wat em to komen mach, myt deme hamme, gheheten de Herstermeet, als vele als 4 medermat. Tho merer waerheyt desser vorscreven punten heb yck her Focko, de to der tyt eyn vorwarer der kercken Reepsholt unde syn leste bychtvader (was), myn ingheseghel ghehanghet beneden an dyt testament unde ghescreven. Datum ut (supra), des vrydaghen vor sunte Jacob.
