| Nummer:oub1596 | Datum:12. Mai 1498 | Overlevering:Editie | Vindplaats:Ostfriesisches Urkundenbuch, II, S. 584, nr. 1596 |
Der Pfarrer Boyo Meyens zu Gross-Faldern u. s. w. bekundet, dass Frau Thaetke Sybkena zu Emden dem Bolardus von Jemgum daselbst 3 1/2, Grase Meedlandes im Midlumer Hammrich verkauft und ihm Gewährleistung versprochen habe.
Ick meyster Boyo Meyens, decretorum doctor, kercher to grote Phalleren unde vicarius perpetuus der kercken Emeden, erkenne unde betughe openbar vormyts dussen mynen apenen bezeghelden breve vor alssweme, woe vor mij ys ghekomen de eerlyke beschedene vrouwe Thaetke Sybkena, borgherske in Emeden, unde bekande vor syck unde oren erffghenamen, dat ze myt vryen wyllen ende walbedachtes modes hadde vorkofft unde noch jeghenwordych in krafft unde macht desses s breves vorcoffte stedes vasten kopes veer grase, een verdendeel myn, meedtlandes, beleghen in Mydlummera hamrick by de Ryder meer an de sudersijt, Here to Grotehusum hefft darbij neghen grase up de norderzyt, unde mytter oesterzyt ligghende an een groen wech, deme beschedene Boelhardo van Jemghum, borgher in Emeden, Elzeken syner eeliker husfrouwen, unde orer beyder erven, vor ene tsumme van ghelde, dewelcke Thaetke vorghescreven bekande oer de eerste pennyngk myt tem latesten van den upghenanten Boelhardo to wyllen unde vuller ghenoeghe wal untrychtet unde betaelt wer, des se eme bedanckte, ende lovede eme unde synen erven dusses vorghescreven landes guede warscuppe to done vor syck unde orer erven vor alle ansprake gheystlikes offte wertlikes gherychtes, wanner unde woe vaken Boelhardo unde der ghenanten syner husfrouwe offte orer twyer erven des van noden tho doen mochte werden sunder argelyst. Hijr an unde over synt ghewest de ersame Johan Scroder van Norden, Johan Wantscherer van Ancken, borghers in Emeden, unde Feyko Poynpkena to Mydlum, allse tugheslude gheropen unde ghebeden. Toe groter unde merer bevestnysse der warheyt, zoe heb ick mester Boyo, doctor unde kercher vorghescreven, myn inghezeghel umme vruntlike bede wyllen Thaetkens voerghescreven beneden to dussem breve ghehanghen. Gheven nae Christi gheboert dusent veerhundert, darnae am achtentneghenste jar, an daghe Nerei, Achillei et Panchracii martirum.
