| Nummer:oub1389 | Datum:7. April 1494 | Overlevering:Editie | Vindplaats:Ostfriesisches Urkundenbuch, II, S. 407, nr. 1389 |
Vor dem Pfarrer zu Gross-Faldern Johannes Moerman verkauft Heinrich von Buldern zu Emden dem Bolhardus von Jemgum ebenda unter Vereinbarung näherer Bedingungen den grössten Theil seines vor Emden jenseits der Stadtbrücke ausserhalb des Zingels bei dem Steinweg und dem Delft gelegenen Warfes.
Ick Johannes Moerman, kerckhere tho groete Phalleren unde vicarius to Emeden, bekenne openbair voir allen, de dessen breff zehen effte horen lesen, dat voir my ys ghekomen de beschedene man Hynrick van Bulderen, borger in Emeden, unde bekande aldair, dat he myd vryen wyllen unde walberadens synnes hedde vorkofft unde vorkoffte yegenwordich in krafft desses breves rechten ervekoepes deme voirsichtigen manne Boelhardese van Jemghum, raytman unde medeborger in Emeden, den meysten deel van synen holtwerve, belegen bueten Emeden over der stadbrugghen bueten der tsyngelen by deme steenweghe unde deme delve, [*] den sudersten deel van deme sulfften werve van Hynricks beschotte an up de suderen syden streckende bes an Ghertrudis van Lyngen werve nae den sueden, unde toen oesten van deme delve bes an den steenwech, unde dat voir hundert Rinsgulden, de Hinrike vorgenomt deger unde all de lateste pennyngh myd deme eersten to syner voller noghe wal betaelt unde vornoghet weren van Boelhardese; unde soe hevet desulffte Boelhardus Hinrike vorgenomt de gnade ghegeven, dat he effte syne erven desen vorg werff mach wedderkoepen in ses yaren erstkomende van Boelhardese effte synen ervent myd hundert Rinsgulden effte oer rechten ghewerde in gueden ghelde. Woerde sake, Hinrick effte syn ervent des nicht wedder en koffte, alze dat seste yaer vorschenen weer up Pinxterachten, soe ys de werff hijrmede erfflick ende ewichlyken vorkofft sonder yenighe upsprake, unde Hinrick sall eme des guede waerscapp doen to allen tyden, soe men van rechte schuldich ic to done to allen rechten, wanneer des Boelhardus van noeden woerde unde Hinrick daerto gheeyschet woerde, alle arghe, bose lyst unde nyge quade indrachte desem kope hynderlick uethghesloeten. Hijr weren mede, an, by unde over de voirsichtigen unde beschedenen manne Lambert van Lynghe raytman, Bernhardus scryver unde Johan Hoppe, medeborgere in Emeden, voir tueghe dairthoe gheeyschet unde ghebeden. Unde desses tor orkunde unde merer witlicheit hebbe ich Johannes Moerman bovenghescreven umme Hinricks vruntlicher bede willen myn rechte seghell ghehangen an dessen breff. Actum et datum anno Domini millesimo quadringentesimo nonagesimo quarto, secunda feria proxima post octavas Pasce. Weer ock, dat Hinrich den werff wedderkoffte unde Boelhardes wes ghetymmert hedde uppe den werff, dat solde em Hynrick betaelen nae vier gueder lude kennynge.
