| Nummer:oub1547 | Datum:30. Juni 1497 | Overlevering:Editie | Vindplaats:Ostfriesisches Urkundenbuch, II, S. 545, nr. 1547 |
Häuptling Viktor Frese zu Loquard und Campen schliesst einen Vertrag mit dem Kloster Sielmönken wegen des Rechts am Aussendeich im 'Lesser Camper' Hammrich.
Ick Victor Fryse, to Loquardt unde to Compum hoeftlinck, kenne unde tughe in dessen apenen beseghelden breve, dat ick hebbe ghemaict ende in craft desses breves teghenwoirdich make eyn fruntlike compositie mitten eerweerdighen gheestliken heren prior unde convente to Sylo van al den uterdyck, in Lesser Camper hammercka beleghen, na utwisinghe der beyder waterlossinghe an beyden syden der vorscr. hammercke, soe dat die vorscr. prior ende convent to Sylo sullen ende willen all oer anpaert, da sy hebben in den selven uterdycke vorscr. an eyn syt affnemen, als by namen an die sudersyt, ende ick Victor vorscr. sall all myn anpaert, dat ick hebbe in den selven uterdyck ghecoft, ghehuyrt off my ghegheven in, holden an die nordersyt[*] ten ewighen tyden sonder my off yemants wedersegghen, om frunschap ende vrede to holden mit malkanderen. Ende hebbe vorder ghelaeft ende in craft desses breves teghenwordich lave voer my ende myne erfghenamen den voerg. priori ende convente in Sylo ende horen nacomelinghen, rechten besitteren des eloesters vorscr., vry ende schadeloes to holden ten ewighen tyden voer alle ansprake des uterdikes, den ick an my hebbe gheholden, als by namen van twe roden an die suderzyt des uterdikes teghen den colck van dertijn roden teghens Ubben lant to Plewert; item van vier roden teghens Heselhusen, twe grazse van drie roden teghens saligher ghedachten Remel Gheltsen lant to Plewert. Item van twe roden teghens Egghe Wynkes lant to Eemden, den God genadich sy, van ses roden meyster Eye, prebendaet to Loquart; item van anderhalff rode meyster Syppe, vicarii to Loquart; item van joncker Kene, myn swagher, neghen roden, van der zaligher vrouwe to Petkum ende Wyardt to Loppersum tosamen sevendehalff rode, ende van Harke to Petkum soven roden sonder all arghelist. Hyr hebben an ende aver ghewesen als tugheslude daerto ghebeden: die eersame meyster Meynerts, myn kercheer, meyster Syppe Jerlefs, vicarius, Aerlff Scriver, Poppe Uken, buerlude daersulffs. In eyn vorder tuychnisse der waerheit heb ick Victor vorscr. myn seghell doen hanghen beneden an dessen breeff. Int jaer onses Heren dusent vierhondert soven endetneghentich, altera Petri et Pauli apostolorum.
