Copia
Wij Borghermesteren ende Raedt in Groeningen betuegen mijt
dessen openen breve dat voer uns sint ghekoemen de
provisoer mitten voechden inder tydt des conventes ten
hilligen gheest binnen unser Stadt ende bekanden voer hem
ende hoeren naekomelingen dat se (doch bij unsse wethen
wille ende consent) hebben angenomen Peter Panne-
backer ende Aleijt syn huesfrouwe voer hoer proveners
hoer beyder levent lanck In nabescreven manieren
Inden eersten soelen Peter ende Aleijt oer beyder levent
lanck hebben ende bewonen de kamer an dat wass
hues Daer tho Jaerlix een guede halve schute
torves Bet alle Jaren up Sunte Johannes tho
midsommer een guedt verendell roede botter mijt
een guet verendel punts koeyen kesen ende alle Browt
een guedt verendell beers Noch ses punt keersen
ende veer pundt smeers tot russchensmeer des
soelen se voert hoer ander kost uuth der koecken halen
als daer nu daghelix ghespiiset wort ende oeck soe
voele broots als se tot hoer notdruft behoeven ghe-
lyck de ander proveners doen. Oeck sullen se
den provisoer mitten voechden gehoersam sijn ende gheen
moijterije noch twijst inden Convente anrichten dan
vredelick mittes conventes volck leven ende offte
em Godt mijt krankheijt vandede salmen se guede
waeringhe ende hantrekinge lathen doen Oeck is
bevorwordet soe ene van hem beyden in den heeren
verstorve sall de inden levende blijvet den proeven
halff hebben uuthgesacht de torff ende lichtinghe
sall blijven als verscr. is, hyr voer hebben Peter
ende Aleijt ghemelten provisoer mitten voechden (woe
desulvigen bekanden) tot behoeff des verscr. conventes
nu voert an gereeden gelde betaelt unde ghegeven
dardehalffhundert embder gulden vande daertho noch
oeck een renthebreeff van anderhalffhundert embder
gulden int principael up hoyckolewen holdende van
welckeer renthebreeff Peter nochtans sijn
levent lanck Jaerlix ontfangen sall dre embder
gulden doch worde de breeff affgelosset sall dat
Convent den hoevetstoel mit de renten hebben ende be-
holden ten ewigen daghen Wyder is bescheyden dat
soe wanneer Peter offte Aleyt ene van hem beyden
afflyvich wordt soe soelen alle des verstorven guederen
weder uuthden convente arven up den verstorven arffgenaam.
Beholtlyck als Peter starvet sullen sijne arffgenamen den
convente gheven vijffendetwintich embder gulden ende als
Aleyt starvet soelen oer arffgenamen den convente gheven
vijff ende dartich embder gulden tot dartich unser stadt
stuver den gulden gereeckent Noch is bescheyden offtet
saecke were dat Peter ende Aleijt niet mitten ander
over een kunden alssoe dat Aleit van Peter muste
scheijden soe sullen de voechden gemelter Aleijt van de
voergen.voer den proeven ghegeven ende betaelde pennonghen
weder trugge gheven hundert embder gulden unde daer
tho noch Jaerlix oer levent lanck ende niet langer
soeven Embder gulden lijffrenten voerbeholden nochtans
de voechden van de hundert gulden sullen inholden unde aff
trecken des ende soe voele guede luede erkennen moegen
Dat Aleijt inden Convente verteert mach hebben
ende sall in sulcken gevalle dan oeck Peter daerna
geholden sijn den voechden Jaerlix ende alle Jaer tho
betalen voer datt he de kamer allene gebruket
dre embder gulden tot dartich Stuver als voer den
gulden ghereeckent. Sunder argelist. Dat Oer-
kunde wij mijt unser Stadt Secreet ghegeven Inden
Jaeren unses heeren dussent vijffhundert neghen ende
tzestich den sessendetwintichsten dach Maij.
Collationeert tegens sijnen Originaelen
versegelden brieff ende daer mede
overeinstemmende bevonden
per me secretarium Groningensem
[handtekening:] Julsing
10-27-87.

x

x

Archiv	Groninger Archieven
Bestand	Arch. Armhuiszittengasthuis
Zugangsnummer	1377
Inventarnr.	0896
Regestnr.	414
Jahr	1569
Datumcode	2605

x

x

x

Material	papier