Johan Ghysselen schoonzoon en Johan en Coepp zoons van Johan Barringe dragen voor buren te Zeyen over aan de abdij van Assen Barringogued c.a. in en buiten de marke van Zeyen in de kerspelen van Vrees en van Peyse. Met bezegeling door Tyman Auinge.

Ick Johan Ghysselen, Johan Baeringes dochter man Johan ende Coepp, Johan Baeringen echte soens
bekennen ende betugen samentlike in dessen openen breve voer ons ende voer onse rechte erffgenamen
dat wy hebben verkofft ende vercopen ewelike ende erfflike der Eerberen Jonckvrouwen Golden Stellingen
Abdyssen des cloesters van Assen ende hoeren cloesters luden Barringe gued myt al synen tobehoer
made ende lant, waer ende schaer, huus ende hoff als de gelegen synt inder marcke ende buten der
marcke van Zeyen ende onder den clocken van Vrees ende onder den clocken van Peyse voer ene summe
gheldes de ons vull ende all betaelt is de leste penninck mitten eersten. Ende des hebben Johan,
Johan ende Coepp voerscreven broder Heinricke Schedinge inder tyd procurator des cloesters voerscreven den stock
daer van ghelecht tottes cloesters voerscreven behoeff voerden buren van Zeyen als lanthrecht is ende
hebben hyr van vertegen alles rechtes ende eygendoems ende den Abdyssen ende horen Conventsluden
dyt voerscreven erve ende gued overghegeven quiid ghesculden ende quyd schelden to besytten ende to ghe-
bruken to ewigen dagen sonder wederzeggen onss off onser erffgenamen. Ende wy Johan Johan ende
Coepp voersscreven ende onse erffgenamen sullen der Abdyssen ende hoeren cloesters luden voerscreven van dessen voerscreven
erve ende guede rechte waersscapp doen na lanthrechte woe vake em des noet is. Alle argelyst
uutghesproken. Hijr weren an ende over Henric Campinge ende Tyman Avinge als dedinges lude
Tyde Levinge ende Ludeken Levingen ende Johan Levinge over dat stock leggen als buur to Zeyen voerscreven
ende anders gueder lude genoech. In een tuech der waerheit so heb wy Johan Iohan ende Coepp
voergenoemd samentlike gebeden Tyman ........ voerscreven voer ons ende voer onse erffgenamen dessen brieff to be
zeghelne want wy selven gheens zeghel ........ Ende ick Tyman vorgenoemd omme bede willen Johans
Johans ende Coepps voerscreven heb minen zeghel beneden an dessen brieff gehangen. Ghegeven int jaer onss heren
dusent vierhondert ende achtensestich des soendages na elven dusent mageden dach.

x

x

Archiv	Drents Archief
Bestand	Arch. Abdij Assen
Inventarnr.	107
Regestnr.	85
Jahr	1468
Datumcode	SpXImVir

x

x

Kommentar	Met geschonden zegel in groene was.

x

Material	perkament
Abmessung (mm)	230/155-165

x