Henrick van Munster heer te Runen, knape, Henrick De Vos Van Steenwick Johanss, Johan van Voerst pastoor in Runen, Bernardus Assensis pastoor in Beijlen, Rodolphus ten Hoeue pastoor in Rolde en Johan Arentsoen priester vicaris in Runen verdelen - als dadingslieden tussen Reijnalt De Vos Van Stenwick Johanss., de abdij te Dickeninge en de abdij te Assen - het genot van het Halerholt; waarbij aan de abdij te Assen wordt toegewezen het hout op een gedeelte tussen den Santacker en de Pothoff. Met bepaling dat ook na mogelijke rooiing van het hout steeds het genot van partijen op de omschreven wijze zal zijn verdeeld. Met medebezegeling door partijen

Wij Henrick van Munster heer toe Runen knape, Henrick de Voss van Stenwick
Johanssoen van wegen Reijnalts de Voss van Stenwick Johanssoen onses swagers
ende broders wij Iohan van Voerst pastor in Runen, Bernardus Assenis pastoer
in Beijlen van wegen des eirwerdigen heren Lubberts Vijncke abt byder
onthengeniss goet [sic] ende synen convente Dickeninge, wij Rodolphus ten Hoeve
pastoer in Rolde, Johan Arentsoen priester vacarius [sic] in Runen van wegen der
eerwerdyger Joffer Reijnolt Jarges abdisse ende hoeren convente toe Assen
alse gesatte ende ghekaerne dedinge luyde van wege der partheijende ende
hoeren erffgenamen ende naekoemelingen voerscreven bekennen ende betugen met desen
openen besegelden brieve dat wij uut hoeren begerten een mynnentlick ghescheit
tot ewigen daeghen onverbreclick te holden uutgespraken ende ghededingt
hebben andragende Halerholte daer aff desse voerscreven parthen gerechte erfgenamen
toe synt, woe groet ende in wat maneeren itlick voerscreven sijn toegeslagen
andeell des holtes buten den essche gelegen beginnende in noet [sic] eijnde ende
zuijtwart uutgaende daer aff hebben, gebruken ende besitten sal in manieren
soe hier na bescreven is. Int erst angaende vander noertzijde soe sal ende maech
Reijnalt de Voss voerscreven off synen erffgenamen tot ewijgen tyden hebben, besitten
ende ghebrucken alsulken holt, cleyn ende groet met den gronde als vanden
campe syns erves Ostebringe buyten den essch gelegen angaende is strec-
kende nederwert sonder mijddel hent op den Stegeacker soe dat nu
ter tijt an beijden eynden affgesteen is daer tot een stucke lants
beneven ende buyten den holte ghelegen toe weltwert an te gebruijcken
tot synen ende syne erffgenamen willen, soe groet ende cleyn als dat oeck affgesteen is.
Ende van dese voerscreven Stegeacker alrenaest sal ende maech hebben erfflike
ende ewelike dat convent van Dickeninge voerscreven ende hoer nakomelingen
all alsulken holt, cleyn ende groet myt den gronde sonder nyddel hent
op den Santacker toe behoerende ende den erve Haeninge soe dat an beyde
eynde affgesteent is ende van den Santacker aldernaest voer an sal
ende maech hebben erfflike ende ewelike dat convent van Assen ende hoeren
nakomelingen all alsulken ho.., cleyn ende groet myt den gronde sonder
myddell hent op den Pothoff soe dat affgesteent is Ende vanden
Pothoff angaende sal Reijnalt de Voss off syne erffgenamen voert an hebben
erfflick ende ewelike alle boemen, cleyn ende groet myt den gronde soedat
ghelegen is hent op dat gescheit, daer die boemen affgehouwen synt
ende nu oeck an beijden eynde affgesteent is hent an den apenlicken
Groeningen wech nu gaende doer dat holt ende nyet aver den wech ende
van dat ghescheit der afgehouwenre boeme ende oeck affgesteent sal dat
convent van Dickeninge voerscreven off hoir nakomelingen tot ewige tyden voirt
an hebben, besitten ende ghebrucken allen boemen, cleijn ende groet met den
gronde sonder middell, so dat gelegen is int uutgaende eynde des
holtes voerscreven. Daer toe sal dat convent van Dickinge als voerscreven hebben
tot den ewigen tyden alsulken holt, cleyn ende groet met den gronde
als gelegen is an die zuyt syde over den Groeningen wech voerscreven
begynnende vanden eynen eynde weder uutgaende (.....
..... sal dat convent van Dickinge) ten anderen eijnde sonder
middell hent an de Lynackeren toe. Oeck is witlicken overdragen
ende besloten off gebuerde dat in dese holte ackeren voerschenen weer
soe sal ende maech eyn itlick vanden parthen voerscreven daer in scheren
ende op dryven nae groete syns holtes ende wardeels alsmen dat nae
redenen ende gueden bescheyde gelijckeste averkomen maech ten wer
saeke off emant syn holt daer afgeholden off aff gevredet (is) hadde
de sal mogelycken des gut vallen ander opdryfft nae gelegentheyt
des holtes dat daer aff gehouwen off affgevredet is. Sonder
argengelist [sic]. In oirkonde der waerheijt soe hebben wij Henrick
van Munster, Henrick de Voss, Johan van Voerst, Bernardus
Assems, Rodolphus ten Have, Johan Arentz voerscreven alse gekaerne
dedingesslude samentlick onse segelen beneden an desen brieff
gehangen. Ende omme der merer vestenisse willen soe hebben
wy Lubbertus Vyncke abt ende Reynalt Jarges abdesse ende Reynalt
de Voss voerscreven alse gerechte hoefft saken ende erffgenamen des holtes voerscreven
onse segelen witlike voer ons ende nakomelingen voerscre-ven an desen
brieff gehangen. Gegeven int jaer ons heren dusent wijfhundert
des maendages na meijdagen.

x

x

Archiv	Drents Archief
Bestand	Arch. Abdij Assen
Inventarnr.	59
Regestnr.	116
Jahr	1500
Datumcode	LpMei

x

x

x

Material	papier

x