Johan Sloet, zijne vrouw Jutte en hunne kinderen Volkier, Yde en Beerte verkoopen aan de abdij van Dickenijnghe eene rente van 6 vierendeel en 3 kop boter uit het goed van Herman ter Hofstad in het kerspel van de Ywehorst. Met medebezegeling door Johan van den Cloester ridder, Reynolt van den Cloester en Roelof van Echten.
Wy, Johan Sloet, Jutte, sijn echte wijf, Volkier, Yde ende Beerte, oer kindere, doen kund ende kenlic alien luden, dat wy vercoft hebben ende vercopen mit dessen tieghenwordighen brieve heren Johan den abt ende den ghemenen convente van Dickenijnghe ses vierendeel boteren ende drye cop jaerliker rente, die gheleghen sin over Hermans gued ter Hofstad in den kerspele van der Ywehorst urn ene summe van ghelde, die ons ende onsen rechten erfghenamen wittelike ende wal bytaelt is. Ende desse ses vierendeel boteren ende drye cop boteren sal die abt ende dat convente voernomt ghebruken, boren ende besitten ewelic ende ummermeer sonder enigherhande ansprake ons ende onser gherechter erfghenamen, alle arghelist uytghesproken ende alle vonde, die den abt ende den convente van Dickenijnghe voerscreven hinderen oft schaden mogen an dessen jaerliken renten voerscreven. In oerkunde der waerheit soe heb ic Johan vornomt dessen brief beseghelt mit minen seghel voer my selven, voer Jutten minen echten wive, Volkier ende Yden ende vor Beerten, onsen kinderen vornomt, ende voer al onse nacomelinghe. Ende wy Jutte, Volkier, Yde ende Beerte vornomt belyen ende volborden dese dinghe voerscreven under Johan Sloets seghel voers. ghelijc alsoft onses selves seghel ware. Ende om meerre vestenisse des brieves ende desser erfliker rente voerscreven soe hebbe wy ghebeden eersamen luden ende wysen heren Johanne van den Cloester, ridder, Reynolde van den Cloester ende Roelve van Echten dessen brief to beseghelen mit oren seghelen. Ende wy, Johan van den Cloester, ridder, ende Reynold van den Cloester ende Roelof van Echten, knapen, hebben om bede willen Johan Sloets, Jutten sijns echten wives, Volkiers, Yden ende Beerten, oer kindere voernomt, dessen beseghelt mit unsen seghelen tot enen waren tughe desser saken voerscreven. Ghegheven int jaer ons Heren dusent driehundert vijf ende tsestich des Saterdaghes na onser Vrouwendach to Lichtmisse.
