Ludeken Johans soen, richter te Zwolle oorkondt, dat Johan van Tiueren Heynrics zoen, bij de opname zijner dochter Wendelmoet in de abdij te Dickeninge, daaraan schonk als haar aandeel in zijne nalatenschap eene heerenpacht van 13 1/2 pond als eerste pacht uit zijn edel eigen goed Colckic-guet in het kerspel van Zwolle in de buurschap en de marke te Vaerst en Westerholte, behalve het mastebroecke dat toe den vors. erve ende guede gheslagen is.

Ic Ludeken Johans soen, in der tijt richter toe Zwolle, make kondich allen
luden dat voer mij ende voer gherichteslude hyr na bescreven ghecoe-
men is, daer ic sat toe gherichte in enen gheheygeden heymael, Johan
van Tiveren Heynrics zoen, ende becanden dat hij voer hem ende voer
sine erfg. ewelic ende ummermeer ghegeven heeft ende gaf aldaer voer
mij over in den selven gherichte slicht van der hand erflic toe besitten ende
toe ghebruken de eerbaren abt ende sine ghemeyne coventes luden toe
Dickenige ende alle oere naecomelinge die oere coventprovene to Dickeninge
hyrna besitten soelen myt Wendelmoet, sijnre dochter, doe se in dat selve
cloester vors. ancomen mach viertiendehalf pond herenpachts des
jaers erfliker renten dat die ierste pacht is uut sinen alinghen erve ende
guede dat een edel eyghen is, gheheiten Colckic guet, also als dat ghelegen
is mit rade mit onrade ende mit alle zine toebehoeren als hi nu ter
tijt ligghen hevet in den kerspel van Zwolle ende in der buerschap ende marc-
ke toe Vaerst ende Westerholte uyt gheseget dat Mastebroecke dat toe
den vors. erve ende guede gheslagen is te betaelen alle jaer desse vors. jaer
renthe die ene helfte op Sunte Mertens dach in den winter ende die ander helfte
op Sunte Peters dach ad Cathedram toe pachrechte mit paymente als die
here van den lande ghemeinlic in Sallant van sijnre pacht boert ende weert
sake dat desse vors. pacht nyet jaerlix betaelt en woerde als vors.
is, so mochte dan die eerbaer abt ende sine coventislude van Dickeninge
in der tijt of oer ghewaerde baden desse vors. pacht uyt den vors. erve
ende guede panden of doen panden mit enen dachlix richter of myt sinen
baeden alse rechte pacht ende mitten panden dan voert te varen alse
recht ende ghewoenlic in den lande van Zalland is van panden die voer
pacht ghepant sint ende Johan vors. liet ende droech den vors. eerbaren
abt ende sine coventisluden van Dickeninge ende toe behoef oere nae-
comelinge als vors. is, die viertiendehalf herenponde des jaers
uyt dien vors. erve ende guede erfliken voer mij daer op in den selven
gherichte ende verteech daervan mit allen rechte also dat hi noch sijn
erfg. daer of nummermeer nyet meer rechtes to esghens noch an-
spraecke an beholden en hebben ende lovede hem desse vors. jaerrenthe
toe waren uuyt den vors. erve ende dat dat erve vors. een edel eygen is
wo dat hij em dat mit rechte schuldich is toe waren na den lantrecht
van Zalland voer em voer sine erfg. ende vor alle dieghene die des
to rechte comen willen sonder arghelyst. Hyr weren over ende an alse
gherichteslude Helmich van der Schueren, Clawes Heyye ende anders
gueder lude genoech. In orconde des breefs so heb ic Ludeken richter
vors. mijn zeghel ende omme bede wille Johans vors. an dessen brief
ghehangen ende om de meerre vestenisse wille so heb ic Johan vors.
vor mi ende vor mine erfg. mijn zeghel mede an dessen brief gehangen.
Ghegeven in 't jaer ons Heren dusent vierhondert ende viertien,
op Sunte Bonifacius daghe.

x

x

Archiv	Drents Archief
Bestand	Arch. Abdij Dikninge
Zugangsnummer	440
Inventarnr.	1
Fol. Nr.	fol. 60v
Regestnr.	200
Jahr	1414
Datumcode	Bonifa

x

x

Kommentar	Met medebezegeling door J. v. T.

x

Material	perkament