Vertrag der Stadt Groningen mit Junker Ulrich Cirksena und dem Häuptling Sibo Attena in Esens über die Freiheit des Handelsverkehrs.
Wy borgermester ende raed der stad van Groningen, hoefftlinge, rechter ende gemene meente derselver stad ommelanden, bekennen unde tugen openbaer an dessen breve, dat wy omme lieffmode ende omme gueder sunderlinger[*] vrentscapp sint overgekomen ende verdragen myt den ersamen vromen juncker Olricke, to Grietzyll, Norden, Aurike, Emden, Berum etc., in Oestvrieslanden hoefftlingk, ende Syben, to Ezense, Stedesdorpe, Dornum, Wytmunde etc. hoefftlingk, dat alle oere coepluude, borger, inwoner ende ondersate sullen ende mogen oere komenscapp ende neringe zoken ende doen in allen onsen herlicheyden ende gebeden, te water ende te lande, gelyck onses selves ondersate, vry, velich, onbehindert, sunder alle scattinge eder ongelt, in den rechten markeden ende bitten markeden, van allen guederen, wo die gelegen mogen wesen, in den ons ende allen onsen ondersaten alle die voerg. privilegien ende punten in allen manieren, als die voerg. sint, in allen oeren landen ende wateren, der se machtich sint ende onder em gelegen, ghenieten mogen ende geholden werden, so ons die bezegelt sint, als dat wy ende die onse die Emeze[*] ende alle ander ryvere ende watere in allen hoken oestwert, zuudwert, westwert ende nortwert sprutende in ende ut, doer ende weder doer, up ende neder in Westfalen, in Zegeederland, [*] up zassmarkeden, [*] ende in allen anderen steden Oythe, Ape ende anders, waer die gelegen sint, daer men markede ende komenscapp holdet vry, velich als vorscr. is, varen ende bruken gelyck den[*] oeren sunder alle argelist. In orkonde hebben wy onser stad zegell hiir an gehangen, daer ons hoefftlinge ende rechter voerg. wall an genoget. Ghegeven in den jaer ons Heren dusent vierhundert soven ende vyfftich, des donredages na Philippi et Jacobi apostolorum.
