Vertrag zwischen den Grafen Edzard I. und Uko von Ostfriesland und der Stadt Hamburg über die Ausführung des Vertrages über den Verzicht auf Emden und Leerort.

Wij Edzard unnde Uko, gebrodere, greven in Oestvreslannd, vor uns, unse erven unde nakomelinghe, unnde wij burgermeistere unnde rathmanne der stad Hamborch, vor uns unde unse nakomelinghe, bekennen unde betughen apembare in desseme openen breve vor allesweme, dat wij na sulker frundliken unde endliken eyndracht, vordracht unde afschede der slothe unde stad Emeden unde Lerorde unde erer tobehoringhe tusschen uns malkanderen geschen na lude unde inholde der breve daraver gegeven, [*] is bespraken, gedegedinget unde vorlathen, dat wij Edzard unde Uko graven erben. scholen unde willen sodanne breff by uns wesende, ludende uppe teyndusend margk, ertydes vom rade tho Hamborch vorsegelt, tusschen dith unde Pinghsten tokamende by den ersamen rad tho Groninghen beschigken unde legghen, dergeliken willen unde scholen wij borgermeistere unde rathmanne der stad Hamborch enen breff by uns wesende, ludende uppe de erbenanten slothe unde stad unde van zelighen jungkheren Olricke, desser genanten greven vader, vorsegelt, [*] ok bynnen sulke baven bestymede tijd beschigken unde legghen by de genanten von Groninghe, uns doch unschedelick unde unvorfengklick quade eventuer, de an sulke breve mochten kamen; welker beyden breve so langhe by den von Groninghen scholen berouwen, beth dat wy Edzard unde Uko, unse erven edder nakomelinghe, de latesten penninghe der teyndusend Lubsche margk, in den hovetbreven von wegen der erben. vordracht bestymmet, deger unde all hebben gegulden unde betalet. Wanner denne sulke betalinghe der latesten penninghe is gescheen, offt wanner wy by den von Groninghen edder anderswor, dar das de von Hamborch eyn benogend hebben, sulken geloven hebben gemaket unde gedan, dat sulke teyndusend Lubessche margk uppe sulcke jar unde termyne im hovetbreve bestymmet, von den genanten greven wol gegulden unde betalet scholen werden, so scholen unde moghen de von Groninghen sulken breff von uns by se gelecht deme rade tho Hamborch, unde sulken breff von uns von Hamborgh by se gelecht den genanten greven sunder jenighe insaghe weddergheven unde averantwerden. Weret ok sake, dat de breve by den von Groninghen so langhe solden bliven beligghen, beth de latesten penninghe von uns graven weren gegulden unde denne er der gantzen betalinghe gebreke daran geschegen, denne scholen unde moghen de von Groninghe sulke breve, vom rade von Hamborch by se gelecht, demsulven rade von Hamborch sunder alle argelist wedder ton handen lathen kamen, unnd ok de breff von den greven by se gelecht schal densulven greven ok wedder gehandrecket werden dergeliken. Alle vorschreven stucke unnde artikell in desseme breve begrepen laven wy Edzard unnde Uko graven erben. vor uns, unse erven unde nakomelinghe, unnde wy borgermeistere unnde rathmanne der stad Hamborch erben. vor uns unde unse nakomelinghe stede, vast unde unverbroken wol to holdende. Tho merer tuchnisse hebben wij Edzard erben. vor uns, unse erven unde nakomelinghe, unse egenen, unde wy Uko vor uns, unse erven unde nakomelinghe datsulve unses broders ingesegell, des wy nu hyrto gebruken, wente wy Uko nu tor tyd neyn egenen ingesegell en hebben, unnde wy burgermeistere unnde rathmanne der stad Hamborch vor uns unnde unse nakomelinghe unnser stad ingesegell witliken an dessen breff hethen hengen, der twe sint eynes ludes, eyn by uns graven, unnde de andere by uns van Hamborgh is in vorwaringhe. De gegeven unnde gescreven is nach Cristi gebord unnses Heren vierteinhundert im dre unde negentighsten jar, ame sonnavende na Remigii.

x

x

Archiv	NStA
Bestand	Rep. 1 (Große Urkundensammlung)
Zugangsnummer	R001
Inventarnr.	0090
Jahr	1493
Datumcode	SpRemigi

x

x

x

Kommentar	Siegel 1 beschädigt erhalten, 2 erhalten, 3 beschädigt erhalten.

x

Editionen	Editie naar dit exemplaar: oub1370.