| Nummer:gus0100 | Datum:14. Jan. 1496 | Überlieferung:Original | Fundstelle:Rep. 1 (Große Urkundensammlung), inv.nr. 0100 |
Bischof Heinrich von Münster quittiert den Grafen Edzard I. und Uko von Ostfriesland über 5000 Gulden.
Wy Hinrick, van Godes genaden bisscop to Munster unde administrator der hilligen kercken to Bremen doen kundt, als wy vor uns unde unse nakomelinge myt sampt den erberen unsen leven andechtigen domdeeken unde capittell unser kercken to Munster, den edelen heren Edtzarde, greven to Oestvreschlandt, unde zynen broder Uken eyne recognicien versegelt heben, vermeldende wy van en theyndusent goldene Rinsche goldene entfangen sollen heben, [*] welckerer guldene men up sunte Merten nestvergangen vyffdusent solde heben betaelt, unde de anderen vyffdusent noch boren sall up sunte Merten nestkomende na lude des schultbreves darvan spreckende, so bekennen wy, dat wy van den ergenanten greven unde zynen broder up huden datum desser quitancien der theyndusent guldene vyffdusent des eyrsten verschennenen termyns gebort heben, [*] schelden ze darvan quyt, ledich unde loyss, oirkunde unses segels hyrangehangen. Gegeven in deme jare unses Heren dusent veerhundert sess unde negentich, up Felicis in Pincis des hilligen confessoris dage.
x
| Archiv | NStA |
|---|---|
| Bestand | Rep. 1 (Große Urkundensammlung) |
| Zugangsnummer | R001 |
| Inventarnr. | 0100 |
| Jahr | 1496 |
| Datumcode | Felici |