Vertrag zwischen dem Bischof Conrad von Münster und dem Grafen Edzard I. von Ostfriesland über die Zahlung der restlichen 5000 Gulden für Emden.

To wetene, dat up huden dach datum desser nottulen vermyts reeden unde frunden des erwerdigen in Gode fursten unde heren, heren Conraitz, van Godes genaden bisscops to Munster und administratoren der kercken to Osenbrugge, ock geschickeden frunden capittels ende stades Munster an eyne, unde vulmechtigen reeden unde frunden heren Edtzardtz, greven to Oestvreschlandt, als nemptlick den erberen mester Hicken ende Hero Maurisses van Dornum, gebroderen, an de ander zyden, oversprocken unde geslotten ys, also dat desulfften mester flicke unde Hero Maurisses vorg. in guden truwen by erer eren gelovet unde geseckert heben sodane vyffdusent goldene guldene, de ergenanten greve to Oestvreschlandt unsen genedigen heren van Munster vurser. schuldich ys bynnen Meppen persoenlick to betalene tot zyner genaden handen up den nesten saterdach na sunte Petri ad vincula dage schyrstkomene, unde off des nycht en geschege, alsdan sollen mester Hicke und Hero Maurisses vurscr. by penen eyner vencknysse bynnen Meppen blyven, dar nycht uth to scheydene, sodane summe vorg. zy eyrsten gensliken unde vullenkomelike betaelt na lude eyns breves vorder darvan inneholdene van en darup gegeven, unde alsdan tyt eyns dages to overkomene van den upgelopenen penen unde gebrecke, zint der zwoene[*] to beyden deelen erresen, unde de to stellene tot erkentnysse unses genedigen heren van Munster vurscr., darmede ock sodane pleyt unde rechtzforderinge to Rome angehaven[*] sunder schaden unses genedigen heren van Munster vorg., zyner genaden undersaten unde bewanten darynne mede benompt, ave unde doet zyn soll. Ock ys vorder bereddet van der byfaert to Emeden, by also, dat unse genedige here van Munster unde de greve to Oestvreschlandt obgemelt en nestkomene donredage persoenlick vulmechtich tor Cloppenborch vromyddages erschynen unde deghenne van den dyngen kundich ys mede bescheyden doen sollen, de markede upn steden in der nottulen des avescheydes to Oyte betekent intosettene unde geholden to werdene up gewontliken tollen unde wechgelt myt sodanen vorwarden, dat men in den rechten markeden aldar liggen unde thoven soll achte dage lanck, unde dree dage lanck buten den markeden, anders upwert unde nederwert to varene up gewontliken tollen unde wechgelt, ten were dan sake, de undersaten to beyden deelen eyne better wyse unde inganck vynden konden, des men to beyden zyden eyn beleyven hadde, den alsdan vor to stellene, unde off men des nycht konde eyns werden, wes dan unse genedige here van Munster vurscr. darup vor eyn myddell uthspreckene werdet, sall darby blyven unde alsdan darup geboerlike versegelinge to beyden zyden to makene, dar yderman mede verwart zy. Ock yst oversproken der gebrecke haben myt heren Hero van Dornum, ritten, des overtoges etc., dat de ergenante greve to Oestvreschlandt unde her Hero vurg. huden frydach over achte dagen to myddage bynnen der Cloppenborch vor unsen genedigen heren van Munster vurscr, sollen zyn, umme de gebrecke, tegen unde zint der ergangenen swoene gescheen, an beyden zyden to verhorene, als myddeler dar tuschen te dedingene unde annetsyne de na lude der vorg. zwoene geflogen mochten werden, unde zo men der in guetlicheyt nycht flyggen konde, wes zyne genade alsdan vor eynen guetliken uthsprocke darover deden, sollen ze an beyden zyden tovredden unde mede gescheyden zijn. Unde desses in oirkunde zint desser nottulen tvve gelykes inneholdes dorch de litteren A. B. C. D. uth eyn anderen gesneden, der eyn vor unsen genedigen heren[*] van Munster vorg. beholden, unde de ander reeden unde frunden des ergenanten greven overgelevert ys. Gededinget unde geslotten in den jare unses Heren dusent veerhundert seven unde negentich, des frydages na sunte Bonifacii dage.

x

x

Archiv	NStA
Bestand	Rep. 1 (Große Urkundensammlung)
Zugangsnummer	R001
Inventarnr.	0103
Jahr	1497
Datumcode	VpBonifa

x

x

x

Kommentar	Certer-Form.

x

Editionen	Editie naar dit exemplaar: oub1543.