Witlick, kundich unde appenbar sy allen erbaren luden, de dessen breff seen, horen offte lesen, dat wy Olrick to Gretsyl, Norden, Aurike, Berum, Emeden etc. hovetlinck in Ostfreslande, unde Wyard van Uphusen to Uldersum etc. hovetlinck, also gekaren schedeslude twyschen Tannen, to Jever, Ostringen unde Wangerlandes hovetlinck, by der eynen, unde Syben, to Dornum, Esensse unde Stesstorpe etc. hovetlinck, by der anderen syden, unsen oheme, hebben alsodane schelinghe unde twydraeht, alsso twyschen en beyden ghewesen ys van der borch to Witmunde myt aller herlickheyt, in vruntscopen sleten in desser nabescreven wise. Ton ersten schal Sybo to Dornum, Esensse unde Stesstorpe etc. unde syne erffnamen, baren unde anebaren, Witmunde myt aller herlickheit hebben, bruken unde besytten gelyck olde Tanne tovoren gedaen hefft, unde desse ergenante Tanne, to Jever etc. hovetlinck, scal de kerken to Berdem[*] twisschen dyt unde negesten sondage, dat ys namentliken des achteden dages na Pinxten, [*] avergheven unde in des kerspels hant schycken, unde na deme anstanden sondage nummer jeghen Syben, synen vrunden unde erffnamen unde des landes argeste to besettende; unde alsodane husinghe, he to Witmunde hefft unde yan murwerke beholden ys, dat schal unde mach Tanne vorscr. van der stede sliten unde laten, wor eme bequeme ys, unde wes desse ergenante Tanne dar vurder van erve unde gudere in deme ampte liggende hefft, scal he bruken gelyek he tovoren ghedaen hefft; unde alle vanghene by beyden syden scholen vrig unde qwydt ghescholden werden. Dat desse scheydinghe war ys, unde wy Tanne, to Jever, Ostringen unde Wangherlande hovetlinck, Sybe, to Dornum, Esensse unde Stesstorpe etc. hovetlinck, under malikanderen desse vorscr. schedinghe belevedt hebben in vruntschopen stede unde vast to holdende, so sint desse zerter twe allens ludende, de ene ute den anderen ute a b c sneden. Darby, an unde aver ghewesen syndt de erbare her Bebbe, prawest to Grotehusen, her Albert, kerckhere to Haghen, Poppo Mannynges, to Lutedesborch hovetlinck, Allike, to Emhusen (!) hovetlinck, Peke Exzen, Umme syn broder, raedgheven in Butjadingen, Eme, vaghet to Norden, Krell, vaghet to Marienhave, und anders vele guder lude genoch. Syndt desser zedelen twe, de ene liggende by Tanne, to Jever, Ostringen unde Wangherlande hovetlinck, unde de ander by Syben, to Dornum, Esensse unde Stesstorpe etc. hovetlinck, wesende.
De ghegheven unde ghescreven sindt in den jaren unses Heren dusent veerhundert LVIo, ame mytweken in den Pinxten.
