Bündnis zwischen Hero von Dornum und Edo Wiemken und der Stadt Hamburg.

Wij Hero von Dornum ritter, to Esensee, Stedestorppe, Withmunde etc., Ede Wymeken to Jever, Ostringk, Rostringh, hovedlinge, vor uns, unse erven unde undersaten eynss, unde wij borgermeister unde radmanne der stad Hamburgh vor unss, unse nakomelinge unde undersaten des anderen deeles, bekennen unde betugen apenbar in diesseme breve vor alssweme, dat wij na guder betrachtinge, rypeme rade, wolvorbedachten mode unde fryhen willen, Gode almechtich to lave, deme hilligen Romschen ryke to eren, deme gemenen besten to gude, ok umme unrechter gewald, averfallinge unde vorkortinge weddertostande, uns loffliken, leffliken unde frundliken voreniget, vorstricket unde tohopesatet hebben, vorenigen, verstricken unde tohopesaten uns jegenwardigen in krafft diesses brieves in nabescrever wysse. Int erste unde boven all scholen unde willen wij erben. hovetlinge mit allen unsen undersaten, tostenderen unde biplichteren den gemenen unschuldigen seevarnden unde copman, sunderges der von Hamburgh borger, coplude unde undersaten, beyde to water unde to lande, mit dem besten helpen, forderen, beschermen unde beschutten unde in nenerleye wyse beschedigen noch ergern laten na alle unseme vermoge, sunder jenige argelist, buthenbescheden apenbar vyende. Dergeliken scholen unde willen wij von Hamburgh dhon wedderumme. Ist ok jenige mishegelicheid, twiste unde unwille der eddelen frouwen grevynnen, den greven, oren sonen, in Östfresland, oren erven unde eren tostenderen ende biplichteren eyns, unde uns erben. Hero van Dornum unde Ede Wymmeken, edder uns borgermeisteren unde radmannen der stad Hamburgh samptliken effte jemande van uns bisunderen des anderen deeles, irrisen edder entstande wurde, dar unser eyn des andern, alsse wij Hero unde Ede der ersamen von Hamburgh, unde wij von Harnburgh der erbarn, gestrengen unde duchtigen Hero unde Eden vorb., to eren unde rechte mechtich sint, so scholen unde willen wij unser eyn deme anderen sodane averfall unde unrechte gewald, de uns edder eneme jeweliken von uns so von der grevynne unde greven unde eren tostenderen mochte weddervaren, schrifliken vorkundigen unde vorwitliken, unde sulkend an dejennen, dar uns dat aff weddervaret, in der besten wyse mit erbedinge eren unde rechtes vorschriven, unde ifft men denne sulkend nicht upnemen, men in unachtsamheid vorleggen wurde, denne scholen unde willen wij, unser eyn den anderen nicht vorlaten, men biplichten, hulpe unde trost to donde na alleme vormoge went tor saken entliken uthdracht, unde darumme uppe legelike stede unde beqweme tyde tosamen komen unde spreken wo men den na gestaltnisse der sake de hulpe will ansetten, so dat de eneme jeweliken na syner gelegenheyd moge profytlick unde nutte wesen. Ifft averst de averfall, gewald unde feyde so hastich anqweme, so dat men von nod wegene darurnme nicht konde tosamene kamen van der hulpe wegene to handelende, so schall de befeydede dat an de anderen vorschriven, unde des syne andacht unde meninghe van der hulpe to donde vorwitliken, dar sick eyn jewelick von uns geborliken unde uprichtigen an schall hebben unde bewysen, darby to donde, allse eyn von denen anderen gerne wolde gedan hebben, ende weme sodane hulpe gedan unde ere behold gesand wert, de schalt en denne kost unde gedrengke, dewyle de in erer hulpe sint, bestellen; men de sulke hulpe uthschigken, scholen en kost unde theringe over wech, wente an den de befeydet wert, bestellen unde soldye besorgen, so lange de in der bevededen hulpe sint unde de vede duret. Neme ok de befeydede vramen [*] in etene, schall to syner koken behoff komen, averst nemen se in dingktale edder gefangen edder in jeniger anderen wyse vramen, den schal sann deelen na antale der werhafftigen, de den vromen geworven hebben. Weret ok sake, dat jemande von unsen uthgesandeme volke in sulker veyde wurde gefangen, dar God vor sy, den scholen ende willen wij von den, de von uns ende den unsen sint weddergefangen edder vangende werden, jegener geven, dewyle der welke sint; beholde wij denne jenige fangen aver, de scholen wij gelik deelen na antale der hulpe, twe to vote vor enen to perde gerekend; hadden ok unse fangen nene jegener, so scholen wij de wedderlosen, ok na antale der hulpe; worden ok von uns jenige slote, veste edder stede gewunnen, dar jemande von uns tovoren jenige rechticheid ane gehad hedde, de scholen denne darby blyven; worde averst wes bekrechtiget, dar nennend von uns tovoren jenige rechticheyd to gehad hadde, scholen to unser alle beste wesen; welk ok von uns erben. mit unser alle wetende tor feyde is gekomen, de en schall nicht affsonen, wij en sint den alle in der sone mede begrepen ende wol daran besorget, unde unser eyn schall deme anderen de tijd diesser tohopesate nicht vorlaten, unde alle dingk keren unde duden ton besten unde mit allen truwen ende loven bistendich unde radsam wesen sunder alle geverde. Diesse tohopesate schall up sunte Michaelis dagh angan unde de neghstkomende teyn jar sunder middel folgende duren, unde ifft wy des synnes worden desse tohopesate ton leggende, so scholen wij eyn half jar tovoren darumme to hope komene. Alle ende isliche vorscreven stecke, puncte unde artikell samptliken unde bisunderen laven wij Hero van Dornum ende Ede Wymmeken erben. vor uns, unsse erven unde undersaten enes, unde wij borgermeistere ende radmanne der stad Hamburgh vor uns, unse nakomelinge ende undersaten des anderen deles, unser eyn deme anderen in groteme geloven geloffliken by unsen truwen unde eren sunder jenigerleye argelist stede, vast ende unvorbraken wol to holdende; unde des to groter tuchnisse hebben wij unser jewelick syn ingesegell witliken benedden an diessen breff gehangen, der twe synt enes luden, den enen wij Hero von Dornum unde Ede Wymmeken, unde den anderen by uns borgermeisteren unde radmannen hebben in vorwaringe. Gegeven unde gescreven nach Cristi gebord unses Heren verteynhundert ime twe ende negentighsten jare, ame dage Michaelis archangeli.

x

x

Archiv	NStA
Bestand	Rep. 1 (Große Urkundensammlung)
Zugangsnummer	R001
Inventarnr.	0432
Jahr	1492
Datumcode	Michae

x

x

x

Kommentar	Anhängende Siegel 1 und 2 erhalten, 3 beschädigt erhalten.

x

Editionen	Editie naar dit exemplaar: oub1335.