Vertrag zwischen den Grafen Edzard I. und Uko von Ostfriesland und Hero Omken von Dornum über das Ende ihrer Fehde.

To weten, dat up hute datum dusses breves vormiddelst deme hoichwerdigen fursten unde heren, heren Conraed, van Godes gnaden bisschop to Munster unde administrator der kercken to Osenbrugge, unsen gnedigen leven heren, myt todaet des hoichgeboren fursten unde heren, heren Hinrikes, seligen hertogen Otten soene, to Brunswick unde Lunenborch hertogen, geschickeden reden sodaner gebreke halven tusschen den edelen heren Edzerde unde juncheren Uken, gebroderen, greven to Oistfresslant, an eyns, unde heren Hero van Dornum ritter unde Eden Wymeken, an de anderen zyden, erhaven unde entstanden, eyne gutlike scheidynge bededynget, belevet unde angenomen is in maten nabescreven. Also dat de ergenanten greven de dorpere Nendorp unde Westerholte weder solen vallen laten unde stellen tot handen heren Hero ritters vurgenant, gelick se var der veheden weren; vermeynden ouck de obgnanten greven to den vurgerorden dorperen edder to anderen erffnissen erfftael halven rechtycheyt to hebbene, sollen se vor synen temeliken richter utdragen unde nicht myt gewalt. Vermeynet ouck her Hero ritter vurg. tegen der gnanten greven sprake to hebbene, sal he dergeliken myt rechte unde nicht mit gewalt vor eren temeliken richter utdragen. Ouck ist mede oversproken, dat desulften greven Ulrich van Dornum fry unde velich by syn husen unde guderen komen unde varen sollen laten, des unbespert to gebruken. Vurder is mede beredet off jement van den vorgerorden partien in deser verledener vehede des anderen undersaten ligenden grunt affgeschattet hadde vor eynen benompten edder zunder benompten penninck, sal men den luden, den sulkes affgeschattet is, vor den penninck, dar men dat vor genomen hevet, edder vor eynen genoichliken penninck na gelegenheit des grundes bynnen dren jaren na datum dusses breves neistvolgene wedder vorkopen edder losen taten. Vortmer heben de parthie opgemelt allen geledenen schaden in deser vergangenen vehede, so wo de eynen Damen eget, dat sy van rove, brande edder anders, zunder middel gestalt an unse gnedigen heren van Munster unde Lunenborch vurg., unde anders dar nergen umme to sprekene off to vorderen zunder geverde, dat ere gnaden tot eren tyden unde na erer gnaden belevinge darup mogen spreken unde dat to beiden syden darby to blivene. Guck ist mede bededinget, dat alle gebreke, so wo de gestalt zynt, tusschen upgenanten greven unde Eden Wymeken vorgerort zollen in fruntlicheyt anstan, numment sick an den anderen to kerene; deshalven unse gnedige here van Munster vurg. tusschen hyr unde verteyn dagen na Paschen neistkomene tusschen den beiden parthen eynen dach wil vorramen unde den yderen parthe doyn eyne mant tovorn verwyttigen, doch by also, dat syne gnade na gelegenheyt unde oirsaken syner gnaden anvallen mochten sulx twe mant tydes verlengen moge, umme to vorsokene, se derwegenen to verliken unde scheidene, unde hyrmede sollen de vilgnanten partien van allen unwillen gruntliken unde leffliken gescheiden syn unde bliven; unde heben dusse vurg. articule unde puncte, gelovet stede ende vast unvorbroken to holdene zunder argelist, unde hyrup heben se sick under malkanderen eyne soenne[*] gegeven vor sick, eren anhange unde alle deghenne, de dusser vehede to schaffen heben, unde hyrup synt dusser breve dre gelick ludene gemaket unde vorsegelt, van unsen gnedigen heren van Munster eyn, unde heren Edzerde, greven vurg., de ander, unde heren Hero van Dornum ritter unde Ede Wymeken de derde overgegeven is; unde wy Conraid, van Goitz gnaden bisschop to Munster unde administrator der kercken to Osenbrugge vurg., hebben des vor uns unde den hoichgeboren furste heren Hinrick, saligen hertogen Otto soen vurg., als dedyngeslude unde tor orkunde unse segel hyran don hangen, unde wy Edzert, greve to Oistfresslant, vor uns unde unse broder. Uken unse segel by unses gnedigen heren van Munster segel tor bekenntnisse unde vestenisse hyran gehangen, dergeliken wy Hero van Dornum ritter unde Ede Wymeken ouck gedan unde itlick van uns unse segele hyran gehangen heben. Gededynget unde gegeven in den jare unses Heren dusent verhundert seven unde negentich, up der elvendusent juncferen dach.

x

x

Archiv	NStA
Bestand	Rep. 1 (Große Urkundensammlung)
Zugangsnummer	R001
Inventarnr.	0436
Jahr	1497
Datumcode	XImVir

x

x

x

Kommentar	4 anhängende Siegel beschädigt er halten.

x

Editionen	Editie naar dit exemplaar: oub1570.