Das Kloster Langen verkauft dem Alrich Remkensen Kuhhaus und Scheune auf dem Klostervorwerk in Nesse.

Wy frater Johannes Boemel van de verhengenisse Gods proest te Longermoniken van der heiliger orde van Premonstreet, doen wittelick, kundich ende apenbaer allen denghenen, die dessen brieff sellen zien off horen lesen, bekennde openbaerlick in der waerheyt myt desen brieff voir allesweme, hoe dat wy myt onsen wryen wyl ende voirberaden ende consent ons conventsluden ende volbort hebben verkoft rechtveerdichs ende vries cops den besceydenen man Alryck Remkenssen ende Geertruyd syn huysvrou ende hueren rechten erven, wonende op den Nes ons voirwerck, een koehues mytter scuren, staende op datselve vorwerck, voir negen stige Arnensche gulden, ende die scure voir twe stige Arnensche gulden ende vier Arnensche gulden ende een tonne Hoemborgher biers to vier tiden te betalen. In dat ierste termyn sal hy gheven hondert Ar. gulden ende een ton Hoemborgher byers acht dage nae Paschen;[*] in dat anderde jaer sal hy betalen dat convent twe stighe Ar. gulden op sinte Jacobs dach apostel, [*] ende in dat derde jaer sal hy betalen dat convent op sunte Johans dach baptist in den sommer[*] twe stige Arnensche gulden ende vier Ar. gulden, ende in dat leste jaer, als in dat vierde jaer na datum des brieffs, sal ick Alryck voirbenoemt off Geertruyd eff ons rechte erven den convent voirgenoemt betalen twe stige Aernenschen gulden op sunte Martens dach, [*] soe dat alle die huese, die daer staen op dat voirwerck, horen Alryck toe ende Geertruyd voirbenoemt off hueren rechten arffgenamen ende synt huer eyghen, behalven dat schoen groote stenen hues, dat daer dat convent noch toehoirt. Mer ist sake, dat Alryck off Geertruyd voirbenoemt off hore rechte erven wolden van dat voirwerck varen, als huer jaerlike huer omkomen is, ende nicht en konden overdragen mytten proest om die huer daerop te bliven, ende oick off dat convent wolde dat voirwerck selve besitten, soe sollen wy proest offte convent voirg. off die datselve voirwerck is huerende, die huesen voirben. copen van Alryck off Geertruyd voirbenoemt off hueren rechten erven, ende betalen na vier goeder luden seggen ende kennen. Ende hier hebben over ende aen gewest heer Jacob, een beleend priester in Eemd, Dirck Koster ende Koerat baertsceerre. Mer in meerre betuychgenisse der waerheyt soe hebben wy provest etc. ons convents segel an desen brieff ghehanghen. Int jaer ons Herrn dusent vierhondert ende tweentachtentich, des vrydachs vor Palmen dach.

x

x

Archiv	NStA
Bestand	Rep. 1 (Große Urkundensammlung)
Zugangsnummer	R001
Inventarnr.	0642
Jahr	1482
Datumcode	VaPalmar

x

x

x

x

Kommentar	Anhängende Siegel verloren.

x

Editionen	Editie naar dit exemplaar: oub1089.