Der Häuptling Ocko in Loquard verkauft der Kommende Abbingwehr 10 Grasen Land im Middelsumer Hammrich.

Wytlick unde kundych sy allen guden luden, dye dessen openen breeff seen edder hoeren lezen, dat yck Ocko, tho Loqwert hoftlyng, hebbe voerkofft unde vorkope yeghenwordich yn desser scryft vryes kopes myt guden beraede unde myt myner moder Dedde wyllen ende fulboert dem commelduer, here Ayden tho Abingweer, unde synen[*] conventesluden 10 graze landes yn Myddelzumra hamryck ghelegen, benamen gheheten Horsawyrde, um 70 Arensgulden, den gulden toe rekenen voer 15 krumsterte, welck ghelt my Ocko vorscreven wal ys betaelt, dye erste pennynck myt dem lesten; unde yck Ocko voerbenamet doe vrye leverynghe dezes landes den vorscreven commelduere here Ayden unde synen[*] conventesluden voer my unde voer mynen vrunden, boren oft ungheboren, utghesecht nye funde unde al arghelyst toe ewyghen daghen. Over dessen kop hebben ghewezen her Francko, toe Uttum kerckhere, unde Beno, provest to Uttum. In merer betugnysse unde oerkunde der waerheit zoe hebbe yck Ocko voerscr. mynen seghel hanghen doen int spatium desses breves. Ghescreven ynt jaer unses Heren M^oCCCC^o unde LVIII, in die commemoracionis animarum fidelium.

x

x

Archiv	NStA
Bestand	Rep. 1 (Große Urkundensammlung)
Zugangsnummer	R001
Inventarnr.	0752
Jahr	1458
Datumcode	OmnAni

x

x

x

Kommentar	Anhängendes Siegel beschädigt erhalten.

x

Editionen	Editie naar dit exemplaar: oub0738.