| Nummer:gus0753 | Datum:12. März 1469 | Überlieferung:Original | Fundstelle:Rep. 1 (Große Urkundensammlung), inv.nr. 0753 |
Der Häuptling Ubbo Tydana in Upleward verkauft der Kommende Abbingwehr 4 1/2 Grasen Land im Middelsumer Hammrich.
Ik Ubbo Tydana, tho Plegawert hoftling, bekenne vor allen guden luden, dar dissen breff seen, lesen edder horen lesen, dat yk hebbe vorkoft unde vorkope jeghenwardiche in desser scryft vryes kopes myt gude berade dem commendur, her Ayden tho Abingwer, ende syne conventesluden, 3 grase landen in Mydelsumra hammerk gheleghen, benamen in Hamtyuch. Item 1 1/2 gras ok in Mydelsumra hammerk gheleghen, benamen in krumma uterdyk, vor 36 Rynsche gulden; welk ghelt my Ubbo vorscreven wal ys betalt de erste pennynk myt deme leste, unde yk Ubbo vorbenompt do vrye leveringhe deses landes dem vorscr, commendur, her Ayden, unde sine conventisluden vor my unde vor mynen vrunden, boren oft ungheboren, utghesecht nye funde unde al arghelyst tho ewyghen daghen. Over dyssen kop hebben ghewesen here Focko, tho Plegawert kerkher, unde Ayld tho Hynte, broder Wernyko tho Heseldahusum unde Lyuwert Seftka. In urkunde dysser warheyt so hebbe yk Ubbo vorscr. ghebeden her Focken vorscr. unde Ayld vorbenampt dussen breff van myner weghen tho beseghelen umme brek des mynes, unde wy here Focko unde Ayld hebben dussen breff umme Ubbe bede willen beseghelt. Ghescreven ist jar unses Heren dusent CCCCoLXIXo, ipso die Gregorii pape etc.
x
| Archiv | NStA |
|---|---|
| Bestand | Rep. 1 (Große Urkundensammlung) |
| Zugangsnummer | R001 |
| Inventarnr. | 0753 |
| Jahr | 1469 |
| Datumcode | Gregor |