Ulrich von Dornum verkauft der Kommende Abbingwehr 12 Grasen Land im Abbingwehrer Hammrich.

Wytlick, kundich unde apenbaer szij allen vramen luden, wat states, aeldes edder weerdicheyden de sint, de dussen breff szeen edder horen lesen, wo ich Oelrick van Dornum bekenne in dussen besegelden apen breve, ick hebbe ghegant unde vor ghelde ghelaten wes landes, also benoemptlick twelf grese landes methlandes, beleghen in veer parthen in Abinghawermer hammerke, den werdighen vramen presteren unde kommelduren tho Abbinghawer myt sodanen vorworden unde vordraghe, also hijr in der sulfthen wijse navolghet. Ich erghenoempthe Oelrick schal eersten tho entfanghen unde entfanghe in reden ghelde hondert golden ghulden, dartho zesse, unde stelle dat vorder ihn irkentnisse twyer vramen luden, de dartho denen, enen van synenthweghen unde den anderen van mynenthweghen, de dat scholen kavelen[*] unde averspreken bin eyn jaer unde eyn dach, wes mij de eerghenompthe kommelduer vor sodane last up sodaen ghelt schal darup legghen; ist daen, my Oelrick darvan nicht meer upthoboren werde affunden, ick den dussen vordrach schal voer enen steden, vasten, ewyghen koep holden unbehinderlick jenighes rechtes, geestlikes edder waerlikes, vor my unde myne nakoemelinghe, se szin gheboren edder unghebaren. Ist dan ock sake, ick Oelrick van Dornum bin eyn jaer unde eyn dach den obghemelthe kommeldueren bode sodan hondert gulden unde zesse wedder thogheven, schal ich des koer unde wyllen hebben, daermede affthotreden unde myn last weder intholossen. Tho oerkunde unde merer sekeringhe des waerheydes hebbe ick Oelrick van Dornum wytliken doen hanghen neden sen dussen breff myn eghen rechte inghesegel in bywesen des erbaren unde duchtighen Eylkens, tho Uphusen hovetlinges. Dat is ghegheven unde ghescreven int jaer unses Heren dusent CCCC^o XC^o primo, ame donnerdaghe na decollacionis baptiste.

x

x

Archiv	NStA
Bestand	Rep. 1 (Große Urkundensammlung)
Zugangsnummer	R001
Inventarnr.	0760
Jahr	1491
Datumcode	JpDecJoh

x

x

x

Kommentar	Anhängendes Siegel beschädigt erhalten.

x

Editionen	Editie naar dit exemplaar: oub1291.