Der Knappe Roleff von Langen entläßt den Hermann Wesselynck zum Eintritt in die Kommende Muhde aus der Hörigkeit.

Ich Roleff van Langen, knape, do kund, enkenne unde betuge openbare in dessen openen bezegelden breve vor my, myne ervent unde anervent, geboren unde ungeboren, dat ick myt guden vryen wyllen, walbedachten mode, hebbe gheschulden unde gelaten, schelde unde late in krafft desses breves vryg, gwyt, ledich unde loes Hermanne Wesselynck, Gerd Wesselynges sone to Hetel in deme kerspel van Plantlunne, de echte is geboren unde myn vulschuldige egene horafftige denstknecht was unde wezen is, van allen egendome unde egendomsrechte wegene, dar my de vorg. Hermen vor gyffte desses breves mede vorbunden unde togedaen was, unde hebbe densulven Hermen van my geschriven unde darvan vortychtnysse gedaen, beyde myt hande unde myt munde, up alle ansprake unde rechticheit, de ich unde myne ervent an den vorg. Hermen van egendome unde egendomsrechte wegene in jenygerleye wys vor dato desses breves gehat hebbe, offt myne ervent unde anervent dar na gyffte desses breves an heben offt vorkrigen mochten: Also dat de vorg. Hermen nu mer vort myt synen lyve unde alyngen gude sick mach geven, keren, laten sunde wenden in wat state eme bequeme is, unde sunderlynges in dat kloster tor Muden in Vresland, dar ik ene tor ere Godes qwyt, ledich unde loes hebbe laten, vor enen vryen denstknecht sunder myner unde myner ervent unde anervent besperinge, inseggent unde ovelemot; want ik darvor tomer rechten wederstadynge to behoff des guden heren sunte Ludegers weder hebbe entfangen Alberte, des doven Taben unde Aleken syner husfrouwen echten sone, so desulve Aleke is geboren uth enen erve unde huse, geheten dat Bedyckhus, to Langen in dem kerspele van Lengerke belegen, den ik bekenne my van deme vorg. Hermanne wal to wyllen to behoff des guden heren sunte Ludegers vornoget in, unde love darumme deme genanten Hermene syns vrygdoms totostande, to warene, unde gude, rechte, stede, vaste, unvorbrokene warscop to done vor my unde vor alle myne ervent unde anervent, unde vorder vor alle degene, de des tho rechte komen wyllen, war, wanner unde wo vakene unde myt weme deme vorg. Hermene des not unde behoff unde to donde is, ane wedersprake unde all argelyst. Alle desse vorgenompten stucke, punte unde articule, semptlich unde bysundern, bekenne ik Roleff van Langen, knape vorg., unde love de vor my unde vor myne ervent unde anervent, geboren unde ungeboren, war, stede, vast unde unvorbroken to ewygen tyden sunder all argelyst offt bedroch wal to holdene, unde hebbe des to tuge der rechten warheit myn rechte ingezegel vor my, myne ervent unde anervent, geboren unde ungeboren, wytliken sande kentliken beneden[*] an dessen breff gehangen. Datum anno Domini M^o CCCC^o LXXX^o te(rcio), [*] dominica proxima post festum Dorothee virginis.

x

x

Archiv	NStA
Bestand	Rep. 1 (Große Urkundensammlung)
Zugangsnummer	R001
Inventarnr.	0824
Jahr	1483
Datumcode	DpDoroth

x

x

x

Kommentar	Anhängende Siegel verloren.

x

Editionen	Editie naar dit exemplaar: oub1110.